Link açıqlığı

Qarasuvbazar şeer yolbaşçısını Qırım işğaline olğan munasebeti sebebinden istifağa çıqmağa mecbur eteler


Qarasuvbazar şeer yolbaşçılığınıñ deputatları şeer başı Albert Kagniyevniñ istifasını talap eteler. Bunı şeer şurasınıñ eñ büyük deputat firqasınıñ yetekçisi Mihail Rozum bildire, –dep haber ete öz başına ilân etilgen Qırım akimiyetine yaqın olğan «Krıminform» saytı.

«Biz Kagniyevni şeer başı olaraq tanımaymız ve şeer şurasınıñ sessiyasına barmağa acet körmeymiz. Çoq milletli şeerimizde yalıñız bir milletniñ menfaatını qorçalağan ve umuqırım referendumnı ve Qırımnıñ Rusiyege qoşuluvını qanunsız dep tanığan insan vazifeden boşatılmalı», – dey Rozum.

Deputatnıñ sözlerine köre, şeer başınıñ areketleri «Qarasuvbazar sakinleri arasında defalarca açuvnı doğura edi», şunıñ içün eñ büyük firqalardan birisi şeer şurası sessiyasını boykot etmege qarar aldı.

«Sessiyalarda şeer başı özüne maliyeviy yardım ayırıp, tatilge çıqmağa tırışa. Mayıs bayramlarnı, şu cümleden mayısnıñ 9-nı boykot etkenden soñ, ve atta esli başlı insanlarnıñ ögünde georgiy şeritçikni qoparğanından soñ, biz şeer şurasınıñ sessiyalarına qoşulmamağa qarar aldıq», – dedi Rozum.

O, sessiyalarnıñ boykot etüvi şeer içün müim suallerniñ muzakeresine cayaramağanını qayd etti.

«İyül 18 künü nevbetten tış sessiyada biz «Qurultay RUH» firqası ile Mektepten aldın müessiseniñ ve Medeniy inkişaf merkeziniñ qurucılığı içün topraq damartasınıñ ayırıluvı aqqında qarar aldıq. Bu obyektlerniñ quruculığı tahminen 200 mln ruble masraflarnı talap ete, olarnı Rusiye Federal programmasından ayıracaqlar, şeer başı ise bu programmada iştirak etmek içün areket bile etmedi»,– dedi Rozum.

Firqa yetekçisi şunı da qayd etti ki, deputatlar komissiyalarda iştirak etmege ve Qarasuvbazar ile bağlı olğan meselelerni muzakere etmege devam ete.

İyül 23 künü keçirilmesi kerek olğan Qarasuvbazar şeer şurasınıñ sessiyası kvorumnıñ olmağanı sebebinden keçirilmedi.

XS
SM
MD
LG