Link açıqlığı

«Avdet» qırımtatar gazetasını Roskomnadzorğa çaqtılar


Alâqа, informatsion tehnologiya ve kütleviy kommunikatsiya nezareti boyunca Federal hızmetine «Avdet» qırımtatar gazetasına şikâyet keldi. Bunı Qırım.Aqiqat saytına neşirniñ baş muarriri Şevket Kaybullayev bildirdi.

Onıñ sözlerine köre, bugün onı FSB idaresiniñ matbuat hızmetine davet etip, işbu şikâyet aqqında haberdar ettiler.

Şikâyet vatandaş Rinat Şaymardinov adından yazıldı. O, «Avdet» gazetasını ekstremist malümatnıñ tarqatıluvında qabaatladı. Böyle malümatnıñ sırasına o, misal içün, qırımtatar milliy Meclisiniñ iyül 4-de alınğan «Devlet şurasına» ve akimiyetniñ yerli organlarına saylavlarnı boykot etmege qararınıñ basıluvını kirsetti»,– dedi Şevket Kaybullayev.

«Avdet» gazetasınıñ baş muarriri aytqanı kibi, FSB matbuat hızmetiniñ vekilleri nezaketnen subetleşe edi, amma «bu vesiqa ciddiy aqibetlerge ketire bilecegini añlattılar». Onıñ sözlerine köre, bu şikâyette diger qırımtatar gazetasını – «Qırım» gazetasını da ekstremizmde qabaatlaylar.

Şevket Kaybullayevniñ aytqanına binayen, «Avdet» gazetası siyasetini deñiştirmeycek.

«Avdet» gazetası qırımtatar milliy Meclisiniñ neşir organı sayıla. 1990 senesi iyül 15-den neşir etile.

XS
SM
MD
LG