Link açıqlığı

ATR telekanalınıñ baş müdiri Elzara İslâmova ATR – dünyada yekâne qırımtatar telekanalınıñ satuvı aqqında öşeklerni red etti.

İslâmovanıñ sözlerine köre, telekanal bar küçü ile çalışa.

«Eki yañı leyhanı işlep çıqaracaqmız: sağlıq ve aşçılıq aqqında yayınlar olacaq. «Gravitatsiya» siyasiy yayınımız avgusttan çıqacaq, digerleri – sentâbr ayında. Media-şirketimizniñ bütün leyhaları: Lale bala telekanalı, «Meydan» ve «Lider» radiostantsiyaları, «15 minut» haber saytı olğanı kibi çalışmaqta», – dedi Elzara İslâmova Qırım.Aqiqat saytına.

Onıñ sözlerine köre, Qırımda vaziyet şimdi ğayet qıyındır, ve telekanal istisna degildir.

«İş adamları kendi planlarını bir şaraitte tüşüne edi, yaşamağa ise diger şaraitlerde mecburmız. Biz de içtimaiy-iqtisadiy alanındamız, şunıñ içün Qırım is etkenini biz de duyamız. Bizde de muayyen qıyınlıqlar bar, ukrain reklama sımarlağan şahıslarnıñ bücetleri qapalı, Qırım şirketlerinde reklama bermege imkânları yoq, Rusiyeli – daa açılmadı», – dedi ATR telekanalınıñ baş müdiri.

Aynı zamanda İslâmova şunı da qayd etti ki, «telekanal etrafında menfiy malümatnıñ suniy tarqatıluvı mahsus yapılğan bir arekettir».

«Qırımtatarlar içün ATR telekanalı – adiy bir telekanal degildir, halq variyetidir. Şunıñ içün telekanalnıñ taqdiri aqqında nasıldır bir uydurmalar peyda olğanda, qırımtatarlar qasevet çekmege başlaylar», – dedi o.

Elzara İslâmova eger de telekanal ciddiy bir meselelerge ratskelse, ATR yolbaşçılığı bunı açıq sürette öz seyircilerine bildirecegine işandırdı.

XS
SM
MD
LG