Musulmanlar içün muqaddes Ramadan ayında qırımtatar halqınıñ Türkiye diaspora vekilleri Rusiye tarafından işğal etilgen Qırımğa iftarlar içün savut ve çadırlarnı ketirip olamadılar.
Bunı Qırım.Aqiqat saytına qırımtatar milliy areket iştirakçisi Zair Smedlâyev bildirdi.
Onıñ sözlerine köre, Qırımnıñ şimdiki şaraitlerine baqmadan, Türkiyede yaşağan yurtdaşlar iftarlarnıñ keçirilmesine yardım köstermekteler. Şu cümleden, bir sıra iftarlarnıñ keçirilmesine Türkiyedeki Qırım inkişafı Fondı destek kösterdi.
Faqat, bu sene tarihiy Vatanğa kelmek içün diaspora vekilleri bir sıra maniağa rastkeldiler. Olarğa Türkiyeden Krasnodarğa uçmağa, soñra ise yer naqliyatı ile Qırımğa kelip, Keriç keçitinde uzun nevbetlerde turmağa kerek oldı.
«Qırımğa barıp çıqmaq meselesini olar endi bileler. Bunıñ ile olarda türk yemeklerni pişirmek içün mahsus aletleri bar edi, amma sıñır bekçileri olarnı keçirmege izin bermediler. Bu sırağa iftarlar içün çadırlar da kire. Mesele nede olğanını bilmeyim, amma donatuvnı Türkiyege keri qaytardılar»,– dedi Smedlâyev.
Qırım.Aqiqat saytına Ana-Yurt qasabasında regional Meclis reisiniñ muavini Rustem İbragimov aytqanı kibi, türk fondınıñ yardımı ile Aqmescitniñ bir qaç rayonında ve Aqyarda 5 iftar keçirildi. Qırım müminleri türk yemeklerniñ dadını baqıp oldılar.
«Qırımtatarlar içün böyle qıyın vaqıtta bizni unutmağanları içün çoq minnetdarmız», – dedi İbragimov.
Qırım Müftiyatınıñ malümatına köre, Türkiyedeki Qırım inkişafı Fondı 1998 senesi Eskişehirde teşkil etildi. Onı Türkiyeniñ 9-ncı prezidenti Suleyman Demirel açtı. Fondınıñ esas maqsadı – qırımtatar halqınıñ medeniyet inkişafınıñ destegidir.
