Link açıqlığı

Saatnıñ esas haberi

Qırım «kazakları» «yaşlarnı terbiyelemek ve ükümetke yardım etmek» içün birleştiler


Aqyarnıñ beş «kazak» teşkilâtı cemaat nizamnıñ qoruvı vе yaşlarnıñ vatanperver terbiyelevi içün birleşti, dep haber ete Qırım «akimiyeti»niñ ruporı «Krıminform».

Aqyarnıñ «başı» Sergey Menâylo aytqanı kibi, «Aqyar kazakları Rusiye kazak teşkilâtlarınıñ yekâne cedveline kirsetilmeli ve icraiy akimiyetke devlet emiyeti olğan meselelerni çezmege yardım etmeli».

Onıñ sözlerine köre, şeerde narkomanlarnıñ, qaçaqlarnıñ sayısı çoq olğanı sebebinden cinaiy müit yaşarmaqta eken.

«İçki işler nazirliginiñ bölüklerine yardımıñız kerek olur. Em de Aqyar politsiyası şimdi icraiy akimiyet organları kibi ğayrıdan teşkil etilmekte», – dedi Menâylo.

«Aqyar kazak cemiyeti»niñ yolbaşçısı Vladimir Gavrilov «kazak»lar icraiy akimiyetke yardım köstermege azır olğanını bildirdi.

«Tünevin beş kazak teşkilâtı bir oldı. Aqyar akimiyetinde meselelrimizni çezecek bölükniñ olmasını isteymiz», – dedi Gavrilov.

Menâylo Gavrilovnı «ükümetke» Aqyar kazaklarınıñ inkişafı boyunca leyhanı azırlamağa çığırdı.

XS
SM
MD
LG