Prezident Memuriyeti başınıñ muavini Valeriy Çalıy deputatlarnı Ukrainada tış istilâ şaraitlerinde mesülietli olmağa çağıra.
Bunı o «Pervıy natsionalnıy» telekanalında çıqışta bulunıp ayttı, dep haber ete prezidentniñ matbuat hızmeti.
«Biz şimdi cenk şaraitlerinde çalışamız. Bunı er kes añlamaq kerek. Prezident gece-kündüz çalışa»,– dedi Çalıy.
Prezident Memuriyeti başınıñ muavini deputatlarnıñ mobilizatsiya aqqında qanunğa rey bermegenini cinayet olaraq tanıy, çünki bu qanun orduğa yardım köstermek, Ukraina mustaqilligini qorçalamaq içün azırlanıldı.
O qayd ete ki, «parlamentte deputatlarnıñ Avropa Birligi ile assotsiatsiya aqqında añlaşmanıñ tasdiqlanuvı ile bağlı şamatası bazı deputat taqımları memleket içün ağır zamanda kendi şahsiy menfaatını tüşüngenini köstere eken».
O şunı da qayd etti ki, «Añlaşma sentâbr ayına qadar tasdiqlanılır».
Belli olğanı kibi, çarşenbe künü Şura toplaşuvında «Batkivşçina» firqasınıñ deputatları «Prezidentten Añlaşmanı tasdiqlamaq içün parlamentke bermege talap etemiz»degen plakatını açqan ediler.
