Hilversum felemenk şeeriniñ yolbaşçısı Piter Brortyes Twitter saifesinde yerleştirilgen Rusiye prezidenti Vladimir Putinniñ Voorşoten şeerinde yaşağan 29 yaşında Mariya qızını sürgün etmek içün çağıruvları içün afu soradı.
O, «aqlı olmağanını» qayd etti ve «bu sözler insanlarnıñ çoqusı is etken imdatsızlıq duyğusından kelip çıqqanını» qoştı. Bu kibi munasebetniñ sebebi, onıñ sözlerine köre, Donbasstaki uçaq felâketi oldı.
Evel ğarbiy matbuat vastaları Putinni «Felemenkte öz felemenk arqadaşı ile qurğan aile yuvasından» sürgün etmege çağıruvlar seslendirilgeni aqqında haber ete ediler.
Halqara ekspertler Donetsk vilâyetinden urıp tüşürilgen Malaysia Airlines uçağı yolcularınıñ cesetleri ile 51 konteynerni azırlağan edi.
Bugün bu konteynerlerni «Harkov» halqara ava limanından eki uçaq vastası ile Felemenk Qırallığı Eyndhoven şeerine yollaycaqlar.
«Malışev adına Zavod»ında halqara ekspertler taqımı çalışa, olarnıñ arasında Felemenk Qırallığı, Avstraliya, Malaysia, AQŞ ve Büyük Britaniya ekspertleri de cesetlerni Felemenk Qırallığına yollamağa azırlanalar», – deyler Harkov vilâyet devlet memuriyetinde.
Tünevin Harkov halqara ava limanında «Boeing-777» felâketinde elâk olğanlar ile resmiy vedalaşuv tedbiri keçirildi.
Amsterdam (Felemenk) – Kuala-Lumpur (Malaysia) seferi boyunca uçqan Malaysia Airlines «Boeing 777» uçağı iyül 17 künü Ukraina şarqına tüşürildi. 298 insan elâk oldı.
Ğarp ve Ukraina akimiyeti uçaq Rusiye destegi ile boyeviklerniñ tarafından tüşürilgenini bildireler.
Moskva öz qabaatını red ete ve mesülietni ukrain tarafına yükley.
