İşğal etilgen Qırımda 10 yıl içinde birinci kere «Russkiy balet» Moskva vilâyet devlet teatriniñ gastrolleri olıp keçecek.
Qırımnıñ öz başına ilân etilgen akimiyetine yaqın olğan «Krıminform» saytı bergen malümatına köre, çıqışları Yaltada avgustnıñ 2-den başlanacaq.
«Yaltadan ğayrı, «Lebedinoye оzero» baleti Aqmescit, Aqyar, Sudaq, Keriç, Kefe sakin ve musafirlerine numayış etilecek. Gastroller avgust 8-ne qadar devam etecek», – dep bildireler teşkilâtçılar.
Taqımnıñ bediiy reberi, SSSR halq artisti, horeograf Vâçeslav Gordeyevniñ sözlerine köre, teatr kollektivi bu gastrollerge «hususiy eyecan ile» azırlana.
«Qırımda taqım tahminen 10 yıl çıqışta bulunmadı», – dedi o ve qoştı: «Kelecek çıqışlar – eski dostlarnıñ yañı medeniy meydanda körüşüvleri kibi olacaq».
Gordeyev şunı da bildirdi ki, Qırım Cumhuriyeti ile medeniy işbirlik çerçivesinde teatr balalar içün oyun mektebini açacaq ola.
