Barselona Universitetiniñ içtimaiy lisaniyat merkeziniñ edebiy tercimanı ve taqiqatçı Miquel Cabal Guarro verkami.com kraudfanding platformasında yarımdanıñ işğalinden evel ve soñ qırımtatarlar aqqında çıqarğan vesiqalı filmniñ promo roligini aşkâr etti.
2011 senesi sentâbr ayında taqiqatçı Qırımğa çekim taqımı terkibinde keldi. Mında bir qaç afta devamında qırımtatar halqınıñ edebiyat, ilim, siyaset, sanaat erbapları ve yerli sakinler ile subetleştiler.
2014 senesi mart ayınıñ vaqialarından soñ taqiqatçı filmniñ mündericesini ğayrıdan baqıp çıqmağa ve leyhanıñ qaramanları ile işğal etilgen Qırım şaraitlerinde qonuşmağa qarar aldı.
«Biz Avropağa qırımtatarlar kim olğanını köstermege isteymiz. Bizler içün bu tarihiy qıynlıqlardan keçken ve ögrenilmegen bir halqtır. Film üzerinde iş alıp barmağa bizge qırımtatar jurnalist ve operatorlarnıñ taqımı yardım etti. Olar yañı levha ve intervyülerni endi Rusiyeli Qırımda çıqarğan ediler», – dep tarif etti Miquel Cabal Guarro Qırım.Aqiqat saytına.
Taqiqatçı şunı da bildirdi ki, o, leyhanı Qırım ve Ukrainada, Kiyevde, misal içün, numayış etmege ister edi. Onıñ sözlerine köre, filmni ğayrıdan montaj etmek içün 9 biñ avro toplanılmalı. Kraudfaunding platformasınıñ şartlarına köre, zaruriy paranı toplamaq içün 40 kün berile.
Filmni katalon, ingliz tillerindeki subtitrler ile numayş etmege planlaştıra. «Vatan. Qırımtatarlar» adlı vesiqalı film katalon telekorüv efirinde kösterilecektir.
