QAVE.tv medeniyet aqqında qırımtatar telekanalınıñ peyda oluvı aqqında «Qardaşlıq» cemaat teşkilâtınıñ reisi Asan Emirsaliyev bildirdi. Onıñ sözlerine köre, bu kibi kanalnıñ teşkil etilmesi aqqında ğaye endi çoqtan peyda oldı, amma şimdi bu leyha daa da aktualdir, çünki qırımlılarnıñ büyük bir qısmı Ukrainağa köçti.
«İşbu leyha – cemaat telekorüv şeklindedir. Ukrainada bu kibi leyhalar yoq desek de olur, eñ belli soyu – Gromadske TV. Cemaat telekorüv şekli Avropada ğayet tarqatılğandır. Kanal insanlarnıñ destegi ile çalışa, muayyen bir sponsor yoq. İcadiy taqım mustaqil olmağa ve öz vazifesini eda etmege çalışa. Kanalımıznıñ vazifesi ise – qırımtatar medeniyetiniñ, tarih ve tiliniñ populârlaştıruvı», – dep tarif etti Asan Emirsaliyev.
QHA agentliginiñ malümatına köre, işbu leyhanıñ teşkilâtçı ve icracısı «Qardaşlıq» cemaat teşkilâtı oldı.
İcadiy taqımğa yalıñız «Qardaşlıq» azaları degil de, leyha üzerinde iş ile meraqlanğan diger istidatlı insanlar da kirdi. Al-azırda leyhada üç yöneliş bar – qırımtatar tiliniñ video dersleri, Qırım tarihı boyunca lektsiyalar ve edebiy oquv.
Bundan da ğayrı Asan Emirsaliyevniñ aytqanı kibi, yaqın zamanda icadiy taqımnıñ kenişletüvi ve mediakanalnıñ çerçivesinde yañı yönelişlerniñ açıluvı planlaştırıla.
«Al-azırda yönelişlerden er birisinde aftada iç olmağanda birer çıqaruv etmek içün iş alıp barıla. Bu maqsatqa ise yañı donatuv kerek. Biz studiyadan yayınlav ve meraqlı musafirler ile subetlerni keçirmege, Qırımnıñ itibarğa lâyıq olğan yerleri ve hanlıq zamanına ait olğan tarihiy yadikârlıqları aqqında qısqa süjetlerni çıqarmağa planlaştıramız», – dedi Asan Emirsaliyev.
Kanalnıñ internet saytında olğan malümatqa köre, leyhanıñ maqsadı – qırımtatarlar ve ukrain ve rus tillerinde qonuşqan diger halqlar arasında qırımtatalarnıñ asabalığını populârlaştırmaqtır.
