Link açıqlığı

Qırımtatar qavehanesinde maski-şou – «İçki işler nazirliginiñ» qanunsız faaliyetniñ teşkerüvi (vesiqa)


İyül 22 künü Bağçasarayda «Musafir» qırımtatar qavehanesinde tintüvni keçirgen maskalı insanlar – «Qırım Cumhuriyeti boyunca İçki işler nazirliginiñ» hadimleri edi. Olar Bağçasarayda qanunsız iş faaliyetiniñ keçirilüvi aqqında muracaat boyunca teşkerüvni keçirgen ekenler.

Bunı mütenasip vesiqa tasdiqlay – qavehane saibine teşkerüv aqqında qarar berildi. Vesiqanı öz Facebook saifesinde qırımtatar milliy Meclis reisiniñ muavini Nariman Celâl yerleştirdi.

O emin, uquq qorçalayıcılarnıñ diqqatını qırımtatarlarnıñ qavehanede iftar toplaşuvı celp etti.

«Bağçasarayda, Qırımnıñ diger şeerlerinde olğanı kibi, prokuratura ve MVD hadimleriniñ diqqatını celp etecek qavehane, tükân ve çarşılarnıñ sayısı ğayet çoqtır. Meraqlı, endi qırımtatarlarnıñ er toplaşuvı akimiyetniñ bu kibi munasebetine sebepçi olacaqmı?», – dep yazdı o.

Evel Qırım.Aqiqatqa qırımtatar milliy Meclis reisi muavini Ahtem Çiygoz qayd etkeni kibi, tünevin qavehanede iftarğa tahminen 100 insan kelgen edi. Bugünki tintüvni o, «akimiyet»niñ qırımtatar ealiniñ qorquzuvı olaraq tanıdı. Onıñ malümatına köre, bu kibi tintüvler diger qırımtatar qavehanelerinde de keçirildi.

XS
SM
MD
LG