İyül 21 künü aqşam Kiyev patriarhatı Ukraina pravoslav kilsesiniñ arhiyepiskopı Klimentniñ Aqmesci civarındaki Mramornoye köyünde yazlıq evini yaqtılar. Bunı Klimentniñ özü Qırım.Aqiqatqa bildirdi.
Arhiyepiskop yaqılğan evini daa öz közilerinen körmedi. «Maña telefon açıp, er şey yanğanı, tek demir damı qalğanını söylediler», - dedi o.
Ev yanında Kiyev patriarhatınıñ Ukraina pravoslav kilsesine ait ibadethne yerleşe. Bu territoriya papaz Klimentniñ şahsiy mülküdir.
«Mesele şunda ki, Ukraina öz vaqtında Kiyev patriahatına çoq yardım etmey edi. Kilselerni qurmaq içün yer ayırmağa red ete ediler, onıñ içün biz - papazlar topraqnı öz adına resmiyleştirip, ibadethane qurıp, papazlar içün evler yasay edik. Böyle etip meseleni al ete edik», – dep añlattı papaz.
Yüz bergen vaqianı Kliment bir tenbiyelev kibi tanıy, çünki ileride ev yanındaki kilseni de yaqmaları mümkün.
«Perevalnoye köyündeki vaqialardan soñ («imayeciler» papazlarnıñ kilsesini çekip aldılar) bizim mülkümizge köz taşladılar. Evniñ yaqılvını bir tenbiyelev olaraq qabul etkenimiz sebebinden, ileride kilseni de yaqa bileceklerini añlaymız», – dedi papaz Kliment.
Aynı zamanda, şimdilik qoruyıcı organlarına muracaat etmeycegini bildirdi.
Arhiyepiskop, Moskva patriahatı Aqmescit ve Qırım yeparhiyası da bu işke qarışqanını istisna etmey.
«Biz bu işke Lazarnen bağlı (Moskva patriahatı Ukrain pravoslav kilsesi Aqmescit ve Qırım mitropoliti. – Muar.) bir papaznıñ buña qarışqanını bilemiz. Olar daima Qırımdaki Kiyev patriarhatınıñ bulunmasına kıyış baqa ediler, şimdi de aqibetlerini köremiz», – dedi papaz.
