Aqmescit – Belli qırımlı tarihçı Vladimir Polâkov Qırım.Aqiqatqa bergen intervyüsında yarımada statusınıñ deñiştirmek ıntıluvılarına nisbeten munasebeti aqqında ikâye etti. Soñki vaqialar tarihta yüz bergen adiselerni añdıra, dep ayttı.
– Vladimir Yevgenyeviç, Qırım statusınıñ deñiştirmek ıntıluvlarına siz nasıl davranasıñız?
– Bazı suallerni faydasız yañğıray, çünki menim razılığımnı bir kimse soramadı. Böyle ibare bar – «Boysunğannı taqdir yöñelte, boysunmağannı artından tarta», işte, bu kibi vaziyetke İvanov, Petrov, Ahmadullin tüştiler…
– Bu vaqialarnı işğal dep sayasızmı?
– Asılında yat bir territoriyanı işğal eteler. Tarih boyunca Qırım Rusiye imperatorlığı, Sovet Birligi terkibinde o qadar çoq vaqıt devamında bulundı ki, atta «işğal» ibaresini qullanmağa yersizdir.
– Tarihta buña beñzegen vaqialar bizge nasıl ders qaldırdı?
– Er şey tekrarlana. Pek çoq şey, yazıq ki, amma kederli şeyler. Ve er şey olğanı kibi devam etse, Qırım – bu tek başlanğıç olur, soñra – Donbass, soñ – Kiyev, Poloniya…Tarih tekrarlana.
Ukraina Qırımnı qaytara bilemi sualge cevap bererek, Polâkov qayd etti: «İç bir şey ebediy qalmaz, bütün imperatorlıqlar ahır soñu dağıla». Yarımada Ukraina terkibine qaytarılsa, qırımtatarlarğa ait olmaz. «Qırım Rusiyege qoşulğan soñ 1783 s. Türkiyege ketken qırımtatarlar fursatnı coydılar», – dedi Polâkov.
«Qazan tatarlar qaldılar, olarnıñ cumhuriyeti bar. Qırımtatarlarnıñ sayısı o qadar azlaştı ki, atta olarnı közge almamaq ta mümkün. Ukraina böyle davranışnı 20 yıl içinde numayış etti, o asılında qırımtatarlarnı qabul etmey edi. Bu hayallar iç bir vaqıt ömürge keçirilmez»,– dep qayd etti tarihçı.
Polâkov aytqanı kibi, Ukraina ve Rusiye biri-birine duşman degiller. «Devletler seviyesinde munаsebetler pek müşkül, amma, siyasetçiler kele- kete halqlar ise qala, bunı unutmamalı. Ukraina ve Rusiye – eki qardaş halqı, olarnı ayırmaq mümkün degil. Biz epimiz, qusur ve degerlikler ile birlikte – bir insaniyetlikniñ balalarımız», – dedi Vladimir Polâkov.
