Link açıqlığı

Saatnıñ esas haberi

Milliy areket iştirakçisi qırımtatar halqını saylavlarnı boykot etmege çağırdı


Zair Smedlâyev
Zair Smedlâyev

Qırımtatar milliy areket iştirakçisi, qırımtatar halqınıñ Qurultayı Merkeziy teftiş komissiya yolbaşçısı Zair Smedlâyev vatandaşlarını tanılmağan Qırım Cumhuriyetiniñ «Devlet» ve yerli şuralarına saylavlarnı boykot etmege çağırdı.

«Qırımtatarlar halq olaraq saqlanılmağa istese, saylavlarda iştirak etmek kerekmey», – dedi o Qırım.Aqiqat saytına.

«Biz daima bayram ve matem tedbirlerni yarımdanıñ bütün sakinleri ile qayd ete edik, ziddiyet ve qavğasız. Bugün bizni kontslagerlerde olğanı kibi, etrafnı köpekler ile sarıp, tuvar kibi qafeslerge tıqmağa tırışalar. Eger de biz avlada yaşamağa istesek, saylavlarda iştirak etmelimiz, eger de tuvar olmağa istemesek – demek, birleşip «Devlet şurası»na «saylavlar»nı boykot etmelimiz, çünki neticeler «işğaldum»nıñ kibi olacaq, olarnı uydurıp çıqarırlar»,– dedi Smedlâyev.

Milliy areket iştirakçisi bir sıra şahıslarnıñ «Yedinaya Rossiya» cedveline namzet olğanına ğayet menfiy izaat berdi.

«Meclisniñ qararına baqmadan, saylavlarda iştirak etmek –milliy birlikke ve Qurultay-Meclis teşkilâtınıñ saqlanılmasına köre, şahsiy kâr daa da müim olğan Meclis ve Qurultay azaları bar olğanını köstere», – dedi o.

Smedlâyevniñ fikrince, «Yedinaya Rossiya» saylav cevdeliniñ birinci on insan arasında «qırımtatarlarnıñ qaytuvına ve abadanlaştıruvına keder etken şahıslar» kösterildi.

«İlyasovnıñ iştiragi – anda qırımtatar halqınıñ menfaatı olmağanını tasdiqlay. Anda şahsiy meraq bar», – dey Smedlâyev.

Milliy areket iştirakçisi qırımtatarlar, eda etken vazifelerine baqmadan, öz halqınıñ meseleleriniñ al etilmesine tesir etmey ve ileride qararlarnıñ alınuvından bütünley çıqarılacağını qayd ete.

«Qırım Cumhuriyeti Devlet Şurasına» saylavlar sentâbr ayında keçirilmeli. Qırımnıñ öz başına tayin etilgen baş naziri Sergey Aksönov «Yedinaya Rossiya» firqasınıñ regional bölüginiñ başına turdı. Cedvelniñ birinci beşligine Qırım «spikeri» Vladimir Konstantinov, «spiker muavini» Remzi İlyasov, Rusiye Federatsiya Şurasınıñ birinci azası Sergey Tsekov ve «spiker muavini» Konstantin Baharev kirdiler.

İyül ayında qırımtatar milliy Meclisi Qırım «akimiyeti»ne kendi vekillerini kirsetmek aqqında aprel qararını lâğu etti. «Qırım nazirler Şurası»nda vazifelerni eda etken memurlarğa işten çıqmağa tevsiye etildi.

XS
SM
MD
LG