«Qırım» Fondı» hayriye teşkilâtınıñ baş müdiri Riza Şevkiyev iyül 21 künü Rusiye Federatsiyası Taqiqat komitetiniñ Baş idaresine Hayser Cemilevniñ işi boyunca şaat olaraq çağırıldı.
İnsan aqları boyunca Avropa mahkemesiniñ Rusiye Federatsiyasını qırımatatar halqınıñ lideri Mustafa Cemilevniñ oğlu Hayserni azat emtege mecbur etken qararına baqmadan, o, alâ daa Qırımda apiste bulunmaqtadır. Rusiyeniñ taqiqat organları taqiqat tedbirlerini devam ete.
«Qırım» Fondı»nıñ baş müdiri Qırım.Aqiqatqa aytqanı kibi, o, «Qırım Cumhuriyeti» Anayasasınıñ 10-ncı maddesine tayanıp, şaatlıqnı qırımtatarca bergen eken. Baş taqiqat idaresiniñ taqiqatçısı qırımtatarca rusçağa ve rusçadan qırımtatarca tercimeni etken tercimannı davet etti.
O, taqiqatnıñ ilerimesi ve berilgen sualler aqqında aytmağa razı olmadı. Faqat, Şevkiyevniñ sözlerine köre, taqiqatçı insan aqları boyunca Avropa mahkemesiniñ qararı aqqında bir şey bilmey ve berilgen sualler evelden Ukraina taqiqatçılarınıñ suallerinden pek farq etmey.
Riza Şevkiyevniñ fikrince, bu areketler ve Avropa mahkemesiniñ eda etilmegen qararları qırımtatar halqınıñ lideri, Ukraina halq deputatı Mustafa Cemilevge basım etmek içün qullanıla.
Hatırlatamız, evel insan aqları boyunca Avropa mahkemesi Rusiyeni Mustafa Cemilevniñ oğlunı azat etmege mecbur etken qararnı qabul etti. Bunı adliye naziri Pavlo Petrenko bildirdi.
