Aqmescit – «Qırım ükümeti» «reis muavini» vazifesinden boşatılğan soñ, Moskvalı iş adamı Lenur İslâmov közden ğayıp oldı. İntervyü ve izaatlarnı ne özü, ne de top-menecerleri bermey. Qırım.Aqiqatnıñ malümatına köre, İslâmovnıñ Qırımdaki işi çoq yürmey. Atta, iş adamğa ait ATR kanalınıñ satıluvı aqqında malümat peyda oldı. Aynı zamanda, İslâmovnıñ naqliyenen bağlı biznesine de basqı yapıla.
Aqmescit şeer şurasınıñ naqliye ve alâqa idaresi, Qırımda eñ büyük taşıyıcı şirketlerden biri - «SimSitiTrans» şirketini bozuluvlarda qabaatladı ve 3 şeer marşrutı boyunca añlaşmalarnı bozacağını bildirdi.
Akimiyet Lenur İslâmovnıñ ticaretinen «oğraşıp» başladı
İdare yolbaşçısı vazifesini vaqtınca eda etken Yuriy İvaşçenko qayd etkeni kibi, teşkerüvler neticesinde, añılğan marşrutlar boyunca şirket belgilengen naqliye vastalarından artqaç avtobuslarnı qullana.
«Taşıyıcı şirketke qarşı akt tizilecek ve Rusiye qanunlarına köre kerekli tedbirler alınacaq», – dedi İvaşçenko.
Qırım.Aqiqatqa izaat bergen, «SimSitiTrans» şirketiniñ icraiy müdiri Aleksandr Glebko qabaatlavlarnı esassız, dep tanıdı.
«Devlet şurasınıñ teşkerüvlerni keçirmek içün sebebi yoq edi», – dey Glebko. – Ötkerilgen tedbirlerni tasdiqlağan vesiqalarnı bizge teslim etmediler, yani, olarnı asılında keçirgenlerinde şübelenemiz».
«SimSitiTrans» kendi aqqı ve şanını mahkeme ve prokuraturada isbatlamağa azırlana. Bunen beraber, şirkette bildirgenleri kibi, 12 yıl devam etken faaliyeti devamında daima şeer akimiyetniñ diqqatını celp etken edi.
Ve bunıñ esas sebebi, reber ve hadimlerniñ milletinen bağlı, dep aytalar. Çalışqanlarnıñ aman-aman 70% qırımtatarlardır, saibi ise, Moskvalı iş adamı Lenur İslâmov.
ATR telekanalını az qaldı Temirgaliyevge satacaq ediler
İslâmovnıñ işi yürrüşmegeni, AAC «Atlant-SV» holdingine mensüp ATR qırımtatar telekanalı, «Meydan» ve «Lider-FM» radio stantsiyaları, «Lale» bala qırımtatar telekanalı, ve «15 minut» internet qaynağınıñ işine köre qıymet kesmek mümkün.
Holding reberleri resmiy izaattan vazgeçtiler. Faqat, Qırım.Aqiqat saytı elde etken malümatqa köre, soñki vaqıtları hadimlerge aylıqlarnı vaqtında bermeyler, bir qısımı parasız raatlıqqa yollanıldı. Reklama kölemi bayağı azlaştı.
İslâmovnıñ özü ise, «baş nazir muavini» vazifesinden boşatılğan soñ, izaatlar bermey. Qaynaqlardan biri bildirgeni kibi, keçenlerde İslâmov ATR aktsiyalarınıñ bir qısımını satıp yibermege tüşüngen edi. Telekanalnıñ hadimleri de, bunı isbatladılar. İş adamı aktsiyalarnıñ 25 - 50%-na qadar satmağa niyetlengen edi.
Müşteriler arasında, Qırımnıñ daa bir «baş nazir muavini» Rustam Temirgaliyevniñ adı da añıldı. Şimdiki vaqıtta, Temirgaliyev «Trans-M-Radio», ve «ye-Krım» informatsion agentliginiñ saibidir.
Faqat, vaqıt keçken soñ, bu mesele boyunca Temirgaliyevnen atta körüşken İslâmov niyetinden vazgeçti.
Qırımda Rusiye musulmanları içün telekanal üzerinde çalışacaqlar
ATR telekanalınıñ informatsion siyaseti boyunca baş müdir muavini Lilâ Bucurovanıñ aytqanına köre, şimdiki vaqıtta telekanalnıñ esas vazifesi – Rusiye şaraitlerinde çalışmalarnı devam ettirmektir.
«15 minut» neşiri bildirgeni kibi, mayıs 16 künü, telekanal reberleri Qırım «prokuraturası» tarafından tenbiyelev aldılar. Anda, efirde «terrorist», «işğal» ya da «Qırım işğali» kibi sözlerniñ qullanuvı ekstremistik faaliyetke teñ kelgeni aqqında bildirile edi.
Bucurova qayd etkeni kibi, ATR – «ayırı qırımtatar liderlerniñ telekanalı» degil de, dünyada yekâne qırımtatar telekanalıdır. «Onıñ içün ATR-ni yasaqlanuvdan qorçalamaq içün, bir de bir sözni deñiştirmege kerek olsa (elbette, kerçkeni deñiştirmeden) biz bunı yapacaqmız. Ve bizni añlarlar, dep ümüt etecekmiz», – dedi o.
Eñ meraqlısı şu ki, Lenur İslâmov, soñki vaqıtları musulmanlar aqqında ve musulmanlar içün belgilengen «Al-RTV» federal telekanalınıñ işinde iştirak etmekte. Qırım.Aqiqatqa bildirlgeni kibi, Rusiye islam telekanalınıñ yayınları ATRniñ tehnikiy küçü ile yapılacaq. Belli ki, «Al-RTV» 2012 senesi çalışıp başladı.
Rusiyeniñ avropalı qısımı musulmanlarınıñ Diniy İdaresiniñ reis muavini Damir Mühetdinovnıñ aytqanına köre, telekanalnı ayrı iş-adamlarınıñ sadaqası, Rusiye federal bücetinden ayırılğan grantlar esasında maliye eteler.
