Halqara havfsızlıqnıñ yañı mevamını ufaq halqlarnıñ, şu cümleden, qırımtatar halqınıñ menfaatını köz ögüne alıp, inkişaf etmek kerek.
Bunı Qırım.Aqiqatqa qırımtatar milliy Meclisniñ tış alâqalar idaresiniñ başı Ali Hamzin bildirdi.
Onıñ sözlerine köre, Rusiye ve Ğarpnıñ arasında qarşılıq kerginleşe, şunıñ içün dünyanıñ ileri memleketlerine dialog yoluna adım atıp, «bütündünya buhranından çıquv yollarını» qıdırmağa kerek.
Birinci adım, dep tüşüne Hamzin - «1994 senesi Ukrainanıñ topraq bütünligi boyunca Budapeşt memorandumınıñ kefil devletleriniñ mecburiyet ve mevamı negizine qaytmalı».
«Ekinciden – dünyanıñ ileri memleketleriniñ 1945 senesi olğan №2 Yalta konferentsiyası kibi meydançıqta körüşüvi. Mında ufaq halqlarnıñ, şu cümleden, qırımtatar halqınıñ menfaatını köz ogüne alıp, halqara havfsızlıqnıñ yañı mevamını inkişaf etmek kerek», – dedi o.
Şimdi, dedi Hamzin, er şey belgisiz bir neticege ketmekte.
«Biz, belki de, ekinci cian cenkinden soñ pekitilgen nizam bozuluvınıñ şaatları olurmız. Onıñ yerine içtimaiy sarsıntılar, qanlı milletlerara ziddiyetler, cenkler kele bile»,– dep tüşüne Hamzin.
Meclis temsilcisi emindir ki, Rusiye ve Ğarbiy memleketler «kendi istilâiy mevamlarından vazgeçmeli».
