Qırımtatar milliy Meclisine Qırımnıñ öz başına ilân etilgen akimiyetinde işlemege devam etkenlerni temsiliy organdaki vazifelerinden boşatmağa teklif eteler.
İşbu sual Qurultaynıñ Teftiş komissiya toplaşuvında baqılğan edi, dep bildire Meclisniñ matbuat hızmeti.
«Qırımtatar halqınıñ Qurultayı soñki toplaşuvında alınğan qararğa baqmadan, Qırım Cumhuriyeti akimiyetinde vazifelerge başlağan Meclisniñ bazı azaları kendi azalığı ve vekâletlerini saqlamaqtalar. Meclis toplaşuvını çağırmaq ve cumhuriyet akimiyetine kirgenlerni Meclisteki vazifelerinden boşatmağa teklif etildi»,– denile beyanatta.
Aprel ayında qırımtatar milliy Meclisi Qırım «akimiyeti»ne kendi vekillerini yolladı. Qırımnıñ «birinci baş nazir muavini» vazifesine ATR telekanalınıñ saibi Lenur İslâmovnı, Qırımnıñ «Reskomnats» reisi yerine Meclis reisi muavini Zaur Smirnovnı tayin etmege tevsiye etti.
Mayıs 28 künü Qırım «parlamenti» toplaşuvda Lenur İslâmovnı «birinci baş nazir muavini» vazifesinden boşattı.
İyül 7 künü Meclis aprelde alınğan qararnı lâğu etti. «Qırım nazirler Şurası»nda vazifelerni eda etken memurlarğa işten çıqmağa tevsiye etildi.
