Link açıqlığı

«Mülk Fondı» qırımtatarlarnı milion ruble miqdarında para cöremesinen cezalamağa istey


Aqmescit şeeri Karl Marks soqağı, 25 eski eşilgen biba

Aqmescit – Aqmescitte Arendt qorantasınıñ evi ile bağlı eski dava yañıdan canlandı. «Qırım Mülki Fondı», binanı kiralağan qırımtatar «Qırım» fondundan eki million rubleden ziyade para cöremesini talap etecek ola. Hocalıq mahkemesine muracaat etüvniñ sebebi qurucılıq işlerniñ vaqtında başlanmağanınen bağlı, deyler. Qırımtatar hayriye teşkilâtınıñ reberleri «Qırım mülküniñ» areketlerine çorlanıp, kendi aqlarını mahkemde isbat etmege ve atta, avropalı müessiselerine muracaat etmege azırlar.

Aqmescitniñ şeer şurası bir qaç yıl evelsi kendi qararı ile Karl Marks soqağı, 25 menzili boyunca 16 sotka topraqnı «Qırım» Fonduna» kirağa berdi – üstündeki tarihiy Arendt evini de «qırımtatar medeniyet merkeziy, ofis ve parking içün» ayırdı.

Qırım.Aqiqatqa bildirilgeni kibi, olacaq binanıñ ta 2010 senesiden başlap, leyhası azırlanmaqta. Medeniyet merkezi 5 qattan ibaret olacağı tahmin etile: birinci qatta 130 adamlıq salon, sergi salonı ve vestibül yerleşecek. Ekinci qatta qırımtatar sanaat müzeyi bulunacaq. Üçünci qatnı - ofis odaları, til ve üner dersleri içün ayırdılar. Tamam anda kitaphane de bulunacaq. Dörtünci qatta ise, çeşit neşir, radio ve televideniye muarririyetleri bulunacaq, beşinci qatnıñ üstünde ise, 30-40 adamlıq salon, aşhane ve art-kafe olması belgilendi.

Qurucılıqnıñ bütün masraflarını TİKA teşkilâtı öz boynuna alacaq oldı. Tahmininy esaplarğa köre, leyha 2,5 - 3,5 million dollar etrafında tura. Evelden, binanı 2015 senesine qadar qurıp bitirecek ediler. Fondnıñ teşebbüsi ile 8 daire satın alındı, sakinleri ise, diger yerge avuştırıldı. Amma, teşkilât qurucılıqnı, toqtamağan mahkeme davalar sebebinden başlap olamay.

Aqmescit şeer şurasınıñ qararına medeniyet asabalığınıñ qoruvı ve saqlap qalması boyunca Cemiyeti şikâyet etti. Bazı malümatlarğa köre, bu Cemiyetniñ reberleri, qırımtatarlarğa ve ukrainlilerge qarşı olğan Qırım parlamentiniñ sabıq deputatı Oleg Rodivilovğa yaqınlar. Şikâyet etüvniñ esas sebebi, ğayıp olayatqan Arendt eviniñ tarihiy qıymetinen añlattılar.

Yatırım müddetini bozdılar

İyunniñ ortasında mahkeme davasına «Qırım Мülkü Fondı» qarıştı. Müessise Hocalıq mahkemesine şikâyet etip, hayriye teşkilâttan 2 mln 122 biñ ruble (tahminen $60 biñ dollar) talap ettiler. Aytqanlarına köre, «Qırım» Fondı» yatırım müddetini bozdı.

Riza Şevkiyev
Riza Şevkiyev

«Qırım» Fondunıñ» müdiri Riza Şevkiyev bu şikâyetlerni esassız, dep saya. Onıñ fikirince, müessise öz areketleri ile qırımtatar medeniyet merkeziniñ qurucılığına keder etmege istey.

«Mülk Fondında», daa evelden Ukraina medeniyet nazirligi mahkemege şikâyet berip. Bütün qurucılıq işlerini toqtatmağa mecbur etkenini közge almaylar, işte bu, bizim yatırım programmamız edi, başqası yoq», – dedi Şevkiyev Qırım.Aqiqatqa.

Fond reberi aytqanı kibi, bir taraftan teşkilâtqa işlerni alıp barmağa yasaqlaylar, diger taraftan para cöremesine oğratalar. Devlet qurumlarnıñ bu areketleri, Şevkiyevni raatsız ete. «Er angi saalarda bu kibi davranış olsa, cumhuriyetniñ medeniy inkişafı toqtalıp qalır», - dey subetdeşimiz.

İyül 17 künü, cuma aqşamı, birinci mahkeme toplaşuvı ötkerildi, onda Şevkiyevniñ sözlerine köre, adliyeciler «şikâyetniñ esassız» olğanını isbatladılar. «Mahkemeci, «Mülk Fondu»nıñ dellileri qaviy olmağanını añlap, bu işniñ baqılmasın avgust ayına qaldırdı. Men adaletniñ tiklenmesine işanıp, Hocalıq mahkemesiniñ mülk Fondunıñ şikâyetine red etkenine ümüt etem», - dep qayd etti R. Şevkiyev. Aksi alda, teşçkilât diger müessiselerge, atta Avropa mahkemesine muracaat etmege azır.

Aynı zamanda, Şevkiyev bildirgeni kibi, bir qaç ay evelsi, «Nazirler şurası» «reisiniñ muavini» Lenur İslâmovnıñ odasında körüşkende, «Qırım Мülkü Fondunıñ» reberi «qırımtatar medeniyet merkeziniñ qurucılığına qarşı degil ve bu meselege añlayışnen davrancağını» bildirgen edi. Amma, şimdi fikirini deñiştirgen.

Qırım.Aqiqat «Qırım Мülkü Fonduna» izaat almaq içün muracaat etti, amma anda kerekli malümat bermediler. Kâtip kelecek afta telefon etmege rica etti.

XS
SM
MD
LG