İyülniñ 17-de Donetsk vilâyetiniñ Torez şeeri civarında yolcular uçağı tüşti. Bunı Facebook saifesinde «İnformatsion qarşılıq» areketiniñ koordinatorı Dmıtro Tımçuk bildirdi.
«Saat 16.20 Kiyev ve Rostovdaki topraq üstü hızmetleriniñ «Malaysia Airlines» şirketiniñ «Kuala-Lumpur-Amsterdam» ava seferinen bağı üzüldi. ATO quvetleri ukrain arbiyleriniñ operatsiya alanında PVO vastaları yoq. Bunıñnen beraber, Rusiyege qol tutqan terroristler ve Rusiye Silâlı quvetleriniñ bölükleri regionda PVO vastalarından faydalana», – dep yazdı Tımçuk.
«Ukraeroruh» devlet müessisesi Rusiye-Ukraina sıñırı yanında Malayziya uçağınıñ felâketini tasdıqladı.
İyülniñ 17-de RNBO spikeri Andriy Lısenko bildirdi ki, boyevikler «Buk» zenit tertibatını elde etti. O, yüksekliklerde uçaqlarnı tüşüre bile.
«DNR» boyevikleri iyülniñ 17-de içtimaiy ağlardaki saifelerinde daa bir ukrain uçağı tüşürgenlerini yazdılar.
Malayziya uçağınıñ parçaları Donetsk vilâyetiniñ Grabovo köyünde qala, dep bildirdi «İnterfaks-Ukraina» agentiligine arbiy qaynaqlar.
Şimdilik qaza yerinde ukrain qurtarıcı barmı-yoqmı belli degil.
Agentlikke berilgen malümatqa köre, uçaq Ukraina üzerindeki halqara ayat sıñırlarından çıqmadı.
Öz başına ilân etilgen «Donetsk halq cumhuriyetiniñ» «mudafaa naziri mesleatçısı» İgor Druz içtimaiy ağlarda tarqatqan malümatına köre, Donetsk vilâyetiniñ Torez rayonında An-26 ukrain uçağı tüşürildi.
Birazdan, onıñ aytqanına köre, Rusiye sıñırı rayonında Su-25 ucum qırıcısı tüşürildi.
Grabovo köyü Donetsk vilâyetinde Lugansk vilâyeti ile sıñırda yerleşe ve al-azırda boyeviklerniñ nezareti altındadır.
