Yaponiya Ukrainağa islâatlarnı keçirmek içün bir buçuq milliard dollar miqdarında yardım kösterecek. Bunı iyül 17 künü Kiyevde muzakerelerden soñ Ukraina ve Yaponiya çetel işler nazirleri – Pavlo Klimkin ve Fumio Kisida bildirdiler, dep haber ete Azatlıq Radiosı.
«Biz Yaponiya tarafından bir buçuq milliard dollar miqdarında berilecek ve çeşit maqsatlarğa masraf etilecek yardım aqqında aytamız. Bugünki muzakerelerden evel biz iqtisadiy ilerilev içün yüz million dollarnıñ berilmesi aqqında Añlaşmanı imzaladıq», – dedi Klimkin.
Nazir Kisida qayd etkeni kibi, para devlet bücetine ve islâatlarğa ayırılacaq. Ukrainada islâatlarnıñ maliye destegi paketini Yaponiya baş naziri Sindzo Abe mart 24 künü ilân etken edi.
