Ukrainada Qırımdan mecburen köçip kelgenlerni imtiyaz meskennen temin etmeycekler. Bunı iyülniñ 17-de içtimaiy siyaset naziri Lüdmila Denisova bildirdi, dep haber ete «İnterfaks-Ukraina».
«Zanımızca, qırımlılar kendi evlerine keri qaytacaqlar, şimdi ise devlet olarnıñ yahşı yaşaması içün şaraitler yarata», – dep ayttı Denisova.
«Qırımlılar – bu 11 biñ insan – yerleştirildi, ve bunıñnen bağlı problemler yoq», – dep qoştı o.
Nazirniñ qayd etkenine köre, mecburen köçip kelgenlerni imtiyaz meskennen temin etüv meselesi ükümet tarafından baqılmay, çünki Ukrainada 11 million insan mesken bekley.
İyülniñ 16-na qadar Qırım, Aqyar ve Ukraina şarqınıñ vilâyetleriniñ sakinlerini yerleştirüv ve yaşayış teminlevinen bağlı meseleler boyunca Kiyev merkezine imtiyaz meskenni resmiyleştirmek ve qayd etilmek içün 10 biñ insan muracaat etti.
