Link açıqlığı

Koalitsiyağa kirmegen Ukraina Yuqarı Şurasınıñ firqaları Qırım işleri boyunca nazirlikniñ teşkil etilmesi boyunca bir fikirge kelip olamaylar. Bu sebepten Nazirler Kabineti nazirlikni degil de, işğal etilgen territoriya meseleleri boyunca hızmetni teşkil etecek ola.

Bunı Qırım.Aqiqatqa Ukraina halq deputatı, qırımtatarlarnıñ milliy lideri Mustafa Cemilev bildirdi.

«Bu mevzunı biz iyül 15 künü Yatsenük (Ukraina baş naziri – muarrir) ile muzakere ettik. Onıñ fikirince, fraktsiyalarnıñ Qırım boyunca nazirlikler ve ayrı baş nazir olması aqqında añlaşması yoq. Şimdilik Nazirler şurası derecesinde Qırım işleri boyunca hızmetni meydanğa ketirmege añlaştılar. Böyle hızmet meydanğa ketirilmekte», – dedi Cemilev.

Deputatnıñ sözlerine köre, parlament firqaları bu mesele boyunca bir fikirge kelse, Yuqarı Şura ayrı bir nazirlikni meydanğa ketirmek suailini bakacaqtır.

Cemilev Yatsenük ile Qırım işleri boyunca baş nazir muavini vazifesine namzetlerni de muzakere etti.

«Farqlı namzetler bar edi, Sençenko da şu cümlede. Amma, fikrimce, Sençenko, Çubarov, Cemilev kibi namzetler bir taraftan pek yahşı, diger taraftan ise aksine tanıla. Şunıñ içün anda bitaraf insannı tayinlemek kerek», – dedi Cemilev.

İyül 15 künü Ukraina Yuqarı Şurasında halq deputatları, ükümet temsilcileri, prezident memuriyeti ve cemaat teşkilâtlarnıñ azaları ile tögerek masa keçirildi. İştirakçiler Yuqarı Şura deputatlarına Qırım işleri boyunca ayırı nazirlikni teşkil etmege ricası ile bulundılar.

XS
SM
MD
LG