Link açıqlığı

Bugünde-bugün qırımtatarlarnıñ yalıñız 30 fayızı Mecliske qol tuta, ve bu raqam ep arta.

Bunı «Rusiye ve islâm alemi» analitik merkeziniñ reberi Şamil Sultanov işğal etilgen Qırım ziyaretinden soñ jurnalistlerge bildirdi.

«Misal olaraq, keçken sene qırımtatar halqınıñ temsil organına 60 fayız qol tuta edi. Qırımtatarlarnıñ aman-aman 10-15% yarımada akimiyetinen işbirlik tuta. Olarnıñ ekseriyeti referendumdan evel Sergey Aksönov ve Qırımnıñ şimdiki reberligi vekillerinen iş tutqanlardan ibarettir», – dep tekrarlay Sultanovnıñ aytqanlarını Islamnews neşiri.

Onıñ aytqanına köre, Qırımnıñ qırımtatar ealisiniñ esas qısmı bugün şübelenip otura.

«Bu adamlar içün eñ müimi – Vladimir Putin tarafından seslendirilgen vadelerdir. Mında imtiyazlar, nefaqa miqdarlarınıñ artması, topraq meseleleriniñ al etilmesi, em de qırımtatar gençleriniñ Moskva aliy oquv yurtlarında oqumaq imkânları aqqında laf kete», – dep ayttı Sultanov.

Onıñ qayd etkenine köre, Qırım statusı aqqında mart ayında olıp keçken referendum yarımada ealisini, şu cümleden qırımtatar halqını böldi. Bugünde-bugün qırımtatarlarnıñ ekseriyeti akimiyet ve Meclis arasında seçip olamay. Moskva siyasetşınasınıñ fikirince, «keçirilmesi sentâbr ayına belgilengen saylavlar qırımtatar cemaatçılığını daa ziyade böle bile».

XS
SM
MD
LG