Avropa şurası Avropa komissiyası ve Avropanıñ tışqı siyaset faaliyeti hızmetine Qırım ve Aqyar yatırımlarını sıñırlav aqqında tekliflerini azırlamağa avale etti.
Bu aqqında iyülniñ 16-da Brüsselde Avropa şurası neticelerinde aytıldı, dep haber ete Azatlıq Radiosı.
Avropa şurasını şekillendirgen Avropa şurası devletleri ve ükümetleriniñ yolbaşçıları halqara maliye institutlarını Rusiye tarafından işğal etilgen Qırım ve Aqyarnı açıq ya da gizli sürette tanığan bir de bir leyhanı maliye etüvden vazgeçmege çağırdılar.
Avropa şurası AB çetel işler Şurasına iyül ayınıñ soñuna qadar cezalanacaq şirketler cedvelini azırlamağa avale etti. Cedvelde Ukraina mustaqilligi ve topraq bütünligine qarşı areketlerge maddiy ve maneviy ceetten qol tutqanlar olacaq.
Rusiyege qarşı cezalar aqqında Amerika Qoşma Ştatları da ayttılar. AQŞ maliye Nazirligi bildirdi ki, bir qaç Rusiye bankı ve energetik şirketi cezalanacaq.
