Kiyevde memleket şarqında arbiy areketlerde iştirak etken arbiylerniñ aman-aman yüz soy-sopı Ukraina prezidentiniñ binası yanında piket keçire.
Toplaşqanlar bölükler deñişmesi, tecribeli komandanlarnı tayin etüv ve arbiy hızmetçilerge zarur olğan turmuş şaraitler azırlanmasını talap eteler, dep yaza UNİAN.
Olar devlet yolbaşçısınen körüşmege isteyler.
Ukraina milliy havfsızlıq ve mudafaa Şurasınıñ soñki malümatlarına köre, memleket şarqında üç aydan berli keçirilgen terrorizmge qarşı tedbirler devamında 258 arbiy adam elâk oldı, biñge yaqın kişi yaralandı.
Lugansk vilâyetiniñ İzvarino rayonında ukrain ordusınıñ bölüklerinden biri dört künden berli silâlı separatistlerniñ nezareti altında qala. Olar «Grad» ve artilleriyadan Rusiye-Ukraina sıñırı tarafından ateş açalar. Arbiyler zarar köre, silâ bite, sıq-sıq açılğan ateş sebebinden öldürilgen ve yaralanğanlarnı çıqarıp olamaylar, dep bildirdi zabitlerden biri «Informator» ukrain portalına.
Ukrain ordusınıñ daa eki brigadasını sarıp aldılar. Ukraina şarqında operatsiya ştabınıñ vekili Vladislav Seleznöv bildirdi ki, qaplap alınğan bölükler aqqında haber bar, olarnı qorçalamaq içün kerekli tedbirler alıp barıla.
Ukraina Milliy gvardiyasınıñ matbuat hızmeti bildirdi ki, bugün saba Donetsk vilâyetiniñ Marinovka mesken noqtası yanında silâlı separatistler ukrain arbiylerini sıqıştırıp başladılar. Olar minaatıcı ve tanklarğa qarşı silâdan ateş açalar. Arbiy hızmetçiler birinci ucumğa yol bermediler, yaralanğanlar bar. Rusiyege qol tutqan zararlanğan separatistler aqqında malümat yoq.
