Aqyar faali İnna Yegorovanıñ maşinasını Qırım yolunda Rusiye DPS hadimleri toqtattılar, onı bölükke alıp ketmege isteyler. Qadın ufaq balasınen beraber Kiyevge vaqtınca yerleşmek içün kete edi.
İnna Qırım.Aqiqat saytına bergen malümatqa köre, onı sanki yüksek surat içün toqtattılar. Şimdi o, 7 yaşında qız balası ile beraber Aqmescit-Harkov yolunıñ 110-uncı km qapalı maşinada buluna.
«Politsiya zabiti vesiqalarnı köstermege rica etti, men oña olarnı kösterdim. Men iş şeadetnamesi, Kiyevde maşina alğanda berilgen vaqtınca tehnikiy pasport ve aydavcı şeadetnamesini kösterdim. Er şey şaatlarnıñ yanında oldı. Meni patrul maşinasına kelmege rica ettiler, men razı olmadım. Bir saatten berli küneşte turamız. Maşinamda sıcaqtan pişken bala bar, qapu ve pencereler blok etildi», – dep ayttı qadın.
Onıñ aytqanına köre, zabitler bir de bir protokol tizmediler.
DPS hadimleri qadınnı bölükke alıp ketmege isteyler, çünki o, şahsiy vesiqalar ve bala vesiqalarını köstermedi, demek, «uquq qoruyıcı organlarına qarşılıq kösterdi».
«Bunıñ soñu ne olacaq belli degil. Bugün sıñırğa yetip olurım-yoqmı bilmeyim», – dep ayta qadın.
Onıñ fikirince, DPS hadimleriniñ bunıñ kibi areketleri onıñ cemaat faaliyetinen bağlıdır. Yegorova Aqyarda Rusiyeniñ Qırım işğaline qarşı çıqqanlardan biridir.
