«Namus» qırımtatar halqınıñ aqsaqallar cemaat teşkilâtı «Qırım birligi» Regional cemaat teşkilâtınıñ assotsiatsiya azası oldı. Böylece, teşkilâtlar 2014 senesi sentâbrniñ 14-ne keçirilmesi belgilengen Qırım «Devlet Şurası» saylavlarında beraber iştirak etecekler, dep haber ete QHA.
«Qırım Birligi» cemaat teşkilâtınıñ yolbaşçısı Seytumer Nimetullayev Aqmescitteki matbuat konferentsiyasında çıqışta bulunıp, olarnıñ Halq frontu ve «Yedinaya Rossiya» ile işbirlik tutmağa niyeti bar olğanını bildirdi.
«Qırım birligi» teşkilâtı topraq, mal-mülk munasebetleri, mesken qurucılığı, içtimaiy obyektler, ealini gaz, suv, elektrik energiyasınen teminlev, sağlıq saqlav, matbuat vastaları, medeniyet ve sport saalarını eñ müim yönelişler olaraq belgiledi.
«Qırım birliginiñ» fikirince, qırımtatarlar «akimiyetnen bağ tutmalılar».
«Bugünde-bugün bizler o qadar azmız ki, boykot etsek ve akimiyetke qarşı çıqsaq, halqımıznıñ kelecegi yoq. Bizler akimiyetnen bağ tutmalımız… Bizler Qırımda bar olğan ve olacaq, Ukraina olsun, Rusiye olsun ya da diger devlet, akimiyetnen dialog qurmaq kerekmiz», – dep qayd etti Nimetullayev.
Hatırlatamız, iyünniñ 11-de «Qırım birligi» Regional cemaat teşkilâtınıñ taqdim merasimi olıp keçti.
Onıñ reisi olaraq Geniçesk rayon devlet memuriyetiniñ yolbaşçısı Seytumer Nimetullayev, reisdeşi – Qırım baş naziriniñ sabıq muavini Aziz Abdullayev oldılar. İdare erkânına «Larişes» Qırım tarihiy müzeyiniñ tesisçisi Güliver Altin, qırımtatar iş adamları Rustem Nimetullayev ve Fikret Memetov kirdiler.
