Şimdi Vatanğa – Qırımğa kirip olamağan qırımtatarlarnıñ milliy lideri, Ukraina halq deputatı Mustafa Cemilev ve qırımtatar milliy Meclis reisi Rusiye territoriyasına kiriş yasağını tasdiqlağan vesiqanı elde etmediler. Demek, bu qararğa mahkemede itiraz bildirmege de imkânları yoq.
Bunı Ukraina Yuqarı Şurasınıñ insan aqları boyunca vekâletli Valeriya Lutkovskaya Qırım.Aqiqat saytına bildirdi.
«Şübesiz, bu insan aqlarınıñ bozuluvıdır. Şu sebepten Ella Pamfilovağa eki sefer muracaatta bulundım. Mustafa Cemilev aqqında cevap aldım, lâkin mahkemede itiraz bildirmek içün vesiqanı bermediler. Çubarov ile bağlı cevap daa yoqtır», – dedi o.
Cemilev ile bağlı cevapta Rusiye Federatsiyası sıñır hızmetiniñ mevamı aks oluna. Lutkovskaya degeni kibi, Cemilevniñ «Qırım Cumhuriyetinde» daimiy meskeni olmağanı içün onı Rusiyege kirsetmediler.
«Añlağanıñız kibi, bu cevap samalıqtır. Küreşmege devam etecekmiz»,– dedi Lutkovskaya.
İyül 5 künü Herson vilâyetinden Meclis toplaşuvından qaytqan Refat Çubarovnı Qırımğa kirsetmediler. «Çonğar» kiriş noqtasında Qırım «prokurorı» Natalya Poklonskaya oña «ekstremist faaliyeti» aqqında tenbiyeni seslendirdi.
Bundan da ğayrı Meclis resine Qırımğa kirişi 5 yılğa yasaq olğanı aqqında bildirüv berildi.
Bundan evel böyle yasaq Mustafa Cemilevge berilgen edi.
