Soñki malümatlarğa köre, Moskva metrosında Arbat-Pokrov ağında yüz bergen qaza neticesinde 10 insan elâk oldı, 140 kişiden ziyade yaralandı, dep bildire Moskva şeer yolbaşçısınıñ muavini Pötr Birükov, haber ete Azatlıq Radiosı.
Onıñ aytqanına köre, 106 yaralanğa insan hastahanede buluna. Qaza yerine Rusiye MÇS yolbaşçısı Vladimir Puçkov keldi.
Qurtarıcılar Moskva metrosınıñ «Park Pobedı» ve «Slavânskiy bulvar» stantsiyaları arasında trenniñ üç vagonı çıtadan çıqqan tonnelden yolcularnı çıqardılar.
Moskva prokuraturası vaqianı ögrenip başladı. 8 yaralanğan kişini Sklifosovskiy İnstitutına alıp kettiler. Yolcularnı tahliye etmek içün Fevqulâde vaziyetler Nazirliginiñ 8 vertolöti qullanıldı.
Moskva yolbaşçısı Sergey Sobânin bildirdi ki, şeer akimiyeti elâk olğanlarnıñ soy-soplarına 1 million ruble töleycek.
Moskva boyunca MÇS vekili Viktor Birükovnıñ aytqanına köre, kerginlik eksilgeni sebebinden yañlış signalizatsiya oldı. Bundan sebep tren apansızdan toqtadı ve qaza yüz berdi.
Malümatnı Rusiye Taqiqat komitetiniñ vekili Vladimir Markin tasdıqladı. Naqliyat havfsızlığını bozuv aqqında cinaiy iş açıldı.
