Aqmescit – «Qırımnıñ Rusiyege qoşulması mevzusında keçirilgen referendum» arfesinde öldürilgen qırımtatarı Reşat Ametovnıñ işi boyunca taqiqat devam ete. Onı Rusiye Taqiqat idaresiniñ Qırımdaki taqiqat komiteti ötkere. Bu vaqıtta ise, baba ve aqaysız qalğan, közyaşları qurumağan qoranta azaları qışnı tüşüne.
Qırımda 39 yaşında Reşat Ametovnıñ ceseti tapılğan soñ üç ay keçti. Mart 3 künü erkek arbiy komitetine barıp, göñülliler sırasına yazılmaq içün evden çıqtı. Soñra onı Aqmescitniñ Lenin meydanında kördiler. Videokameralar qayd etkeni kibi, o Rusiye işğaline qarşı çıqıp, tınç narazılıq numayışnı teşkil etti. Andan onı «Qırım imayecileri» vekilleri belgisiz tarafqa alıp kettiler. Eki aftadan soñ ise, Reşat Ametov Qarasuvbazar civarındaki Zemlâniçnoye köyünde tapıldı. Erkekniñ bütün bedeninde azap izleri bar edi. Yanında kelepçeler de tapıldı.
Başsız qoranta
Reşat Ametovnıñ küçük qızı yedi aylıq oldı. Üyken oğlu Ali – altı yaşını toldurdı. Qoranta Aqmescit civarındaki qırımtatarlar toplu yaşağan köyde, qurulmağan evde yaşay. Ametovlar qorantasına matbuat vastaları endi o qadar diqqat ayırmasalar bile, merhumnıñ apayı Zarina, mühbirlernen laqırdı etmege çoq istemey. Pek ağır, dey.
«Aqayım yanımda olmağanına ale daa alışıp olamayım. Onsız pek küç. Balalarnı baqmağa daima yardım ete edi. Maddiy cietiden de qıyın oldı. Balalar babasını sağınalar, üykeni internette onı meydandan alıp ketken video tapıp, künde bir qaç kere baqa», – dey Zarina Ametova.
Merhum Reşat Ametovnıñ ağası – Refat bildirgeni kibi, eñ çoq yardım qırımtatarlar ve qıtaiy Ukrainadan tiydi.Keçenlerde qırımtatar halqı lideri Mustafa
Cemilevniñ vekilleri kelip, qadınğa 10 biñ dollar teslim ettiler. Bu, Cemilev Poloniyada alğan «Birdemlik Premiyasınıñ» bir qısımıdır. Qorantanıñ faciasına diger insanlar da seslendiler: dünyanıñ çeşit köşelerinden balalr içün para ve urba yollanıldı. «Qırımda – bu qırımtatarlar, ve elbette ki, esas yardım Ukrainadan keldi. Pek yardım ettiler, balalarğa urba, atta küçügine yataq, para yolladılar», – dey Refat Ametov.
Reşat Ametovnıñ apayı cinayetçilerniñ tapılacağına işanmay
Aprelniñ başında Rusiye Federatsiyası Taqiqat idaresiniñ «Qırım Cumhuriyeti» boyunca taqiqat komiteti Cinaiy Kodeksiniñ 105-nci maddesi 1-nci qısımı - «öldürüv» boyunca cinaiy iş açtı. Şimdiki vaqıtta taqiqat işi devam ete. Qırım.Aqiqat alğan malümatqa köre, bu işni alıp barğan endi dörtünci taqiqatçı deñişti.
Merhumnıñ ağası Refat Ametov aytqanı kibi, o rusiyeli mühbirlernen qonuşmağa ister edi, çünki olardan iç biri bu vaqıtqace qoranta azalarınen laqırdı etmedi.
«İleride adamlar onıñ areketi timsaliy ve alicenap olğanını añlarlar, öldürüvni eda etkenlerniñ bulması da nümüneviy bir iş olacaqtır», – dep qayd etti Refat Ametov.
Zarina Ametova bu işniñ soñunace taqiq etilecegine inanmay. İstegeni tek bir şey – aqayı ve üç balasınıñ babasını öldürgenleriniñ tapılğanını arz ete. Bundan da ğayrı, qadınnıñ daa bir istegi bar – o işke çıqmağa istey. Qadın tasil boyunca – oca, evine yaqın olğan Maryino qabasında balalarğa oyun dersleri bermesi mümkün.
