Qırım işleri naziri vazifesine Çubarovnı tayin etmege teklif eteler
Qırım işleri boyunca ukrain nazirliginiñ reberi vazifesine Qırımtatar Milliy Meclisiniñ reisi Refat Çubarovnı tayin etmege teklif eteler.
Onıñ namzetini şimdi Ukraina Yuqarı Radasında ötkerilgen Kiyev tögerek masasında siyasetşınas Taras Berezovets teklif etti, dep haber ete Qırım.Aqiqat mühbiri.
«Men Ukraina Yuqarı Radasınıñ sabıq deputatı Refat Çubarovnıñ namzetini teklif etem. O, Qırımda büyük ürmet qazanğan genç bir siyasetçidir. Bu namzet razılaşma ola bile», – dep ayttı Berezovets.
Çubarovdan ğayrı daa bir namzet teklif etildi – Qırım faali Anatoliy Kovalskiy. Oña cemaatçılıq qol tuta.
«Onıñ devlet hızmetinde bayağı tecribesi bar. O, Yevromaydan-Krım areketinde özüni lâyıq bir şekilde kösterdi», – dep bildirdi Qırımdan köçip kelgenlerniñ koordinatorlarından biri Andrey Şçekun.
Ne Çubarov, ne de Kovalskiy tedbirde olmadılar.
Hatırlatamız, bugün Kiyevde Rusiyeniñ Qırım işğalinden sebep Qırım işleri boyunca ukrain Nazirligini meydanğa ketirmek ihtiyacı muzakere etilgen tögerek massa ötkerile.
Tögerek masanıñ teşkilâtçıları «Ukrainskiy meridian» içtimaiy tedqiqler Merkezi, «Qırımdan mecburen köçip kelgenlerniñ koordinatsion şurası» ve Ukrainanıñ Avropa firqası oldılar.
