Rusiye Federatsiyası Büyük Britaniyada aviatsion ve kosmik tehnikanı satın almaq aqqı olğan memleketler cedvelinden silindi. Böyleliknen, Rusiyege bu künleri Britaniyadaki Farnboroda ötkerilgen nevbetteki Halqara aviakosmik salonında iştirak etmege imkân bermediler.
Bu malümatnı Büyük Britaniya tış işler nazirligi jurnalistlerge bildirdi, dep haber ete Nemetskaya volna.
MİD vekiliniñ malümatına köre, böyle bir adım Rusiyeniñ mustaqil Ukrainağa qarşı istilâsı, em de Qırım yarımadasınıñ işğalinen bağlı.
Adet üzre Farnboroda keçirilgen aviasalonğa çeşit devlet ükümetleriniñ temsilcilerini Büyük Britaniya qıraliçesi II Yelizaveta özü davet ete. Bu sefer Rusiye Federatsiyasınıñ memurlarından iç bir kimse böyle bir davetname mektübini almadı.
Farnborodaki aviasalon mütehassıslarda aerokosmik saada esas sayılmaqta. Rusiye er daim çoq sayılı eyyetini yollağan edi. Misal olaraq, 2013 senesi tedbirde «Roskosmos», «Rosaviatsiya», «Rostehnologii» vekilleri, em de sanayı nazirligi ve bir sıra Rusiye ava şirketleriniñ temsilcileri iştirak ettiler.
