Voronej vilâyeti işğal etilgen Qırımnıñ Canköy rayonınıñ inkişafı ve ğayrıdan tiklenmesine kendi bücetinden 1 mlrd. 143 mln. ruble maddiy yardım olaraq ayıracaq, dep haber ete Qırımnıñ öz başına ilân etilgen ükümetine yaqın olğan «Krıminform» saytı.
Bu aqqında malümatnı Canköy rayon memuriyetiniñ iqtisadiyat inkişafı, ticaret ve infrastruktura idaresiniñ yolbaşçısı Stanislav Jakov aydınlattı.
Memurnıñ aytqanına köre, sermiyanıñ eñ büyük qısmı JKH inkişafına ayıracaq – 22 mln. rub., sağlıq saqlav – 16,5 mln., agrar sanayı kompleksi – 17,2 mln. ve Canköy rayonınıñ tasil saası – 14 mln. ruble, dep haber ete neşir.
2014 senesi martnıñ 16-da Qırımda ve Aqyar şeerinde yarımada statusı aqqında sahte referendum olıp keçti. Onıñ neticesinde Rusiye Qırımnı öz terkibine qabul etti. Ukraina, Avropa Birligi, AQŞ rey berüvni tanımayıp, Qırım Rusiye tarafından işğal etildi degen fikirdeler.
