Link açıqlığı

Aqmescit – Qırımtatar halqı Meclisine qarşı yapılğan basqı ep küçleşse de, Aqmescitteki binası üzerinde milliy bayraqnen birlikte ukrain bayrağı da yelpirey. Yerli ealiniñ bir qısımı buña menfiy baqsa da, Meclis azalarınıñ sarı-mavılı bayraqnı alıp taşlamağa niyetleri yoq.

Aynı zamanda, mütehassıslarnıñ fikirince, Rusiye akimiyeti Meclisni idare altına alıp olamasa, ileride bu qurumnı yasaqlay bileler.

«Biz kelecegimizni Ukraina ile köremiz», – miliy areket iştirakçisi

Aprel ayında Qırım «imayecileri» tarafından alıp taşlanğan ukrain bayrağını kene de yerine tiklegen milliy areket iştirakçisi Zodiye Saliyeva aytqanına köre, ileride de ukrain timsalini qorçalamağa azır.

Zodiye Saliyeva
Zodiye Saliyeva

«Biz qorqmaymız… Biz Qırımğa qayttıq ve kelecegimizni Ukraina ile birlikte köremiz, onıñ içün em bu bayraqnı, em bizim bayrağımıznı köz bebegi kibi qorçalaymız. Bunıñ artında bizim devletimiz. Bizim kelecegimiz tura», - dedi Zodiye apte Qırım.Aqiqatqa.

Zodiye apteniñ sözlerine köre, qırımlılarnıñ bazıları qırımtatarlarğa qol tutalar, amma açıqtan-açq fikinlerini bildirmege saqınalar.

Faqat, soravdan keçkenlerniñ büyük bir qısımı Meclis binasındai bayraqnıñ asılı turğanına qarşı çıqtılar.

«Men Qırım sakinim ve Meclis üzerindeki ukrain bayrağınıñ turmasına qarşı çıqam, çünki olar bazılarğa «separatist» dep aytalar, özleri şunı yapalar», - dedi Aqmescitli sakin Vladimir İliç.

Meclisni yasaqlay bileler, – ekspert

Yaqın şarq taqiqatları Merkeziniñ müdiri İgor Semivolosnı yerli ealiniñ menfiy munasebeti iç te taaciplendirmedi.

İgor Semivolos Qırım.Aqiqatqa şunı bildirdi: «Olar evelden de qırımtatarlarnı separatizmde qabaatlay ediler. Bu ruslarnıñ menlik meselesedir, çünki olar eñ başından qırımtatarlarnı «rus dünyasına» qarşı çıqqanlrını añlay ediler».

Ekspert bildirgeni kibi, şimdiki vaqıtta «akimiyet» Meclisni idare altına almağa istey, amma, niyetlerine irişmeseler, qırımtatarlarnıñ temsiliy organını ekstremistik olaraq adlap, yasaqlay bileler.

İgor Semivolos
İgor Semivolos

Vaziyet nasıl etip deñişecegi Qurultaynıñ sessiyasına bağlı olacaq. Semivolosnıñ sözlerine binaen, «kollaboratsionist -satqınlar» vastasınen Qırım «akimiyeti» kendi niyetlerine irişseler ve reberlerni ğayrıdan saylasalar, temsiliy organ olarğa boysunacaq. Qurultay vekilleri toplaşuvnı Herson vilâyetinde keçirseler ve vekiller Meclisniñ siyasetine qol tutsalar, «akimiyet» Meclisni yasaqlamaq içün çalışacaq.

Şimdiki vaqıtta Meclis binası – Qırımda ukrain bayrağı yelpirep turğan yekâne bina, desek yañlış olmaz.

XS
SM
MD
LG