Ukraina vatandaşları Rusiyede bulunuv müddetini 180 künge qadar arttıra bileler, dep bildirdi Federal migratsion hızmetiniñ yolbaşçısı Konstantin Romodanovskiy, haber ete İnterfaks.
Onıñ aytqanına köre, Ukraina şarqında zıddiyet artsa, Ukraina vatandaşlarınıñ aman-aman 500 biñi Rusiyede qaçaq statusı ve vaqtınca sığınaq soray bile.
O, bildirdi ki, 30 biñden ziyade Ukraina vatandaşı Rusiye Federal migratsion hızmetine qaçaq statusı ya da vaqtınca sığınaq almaq içün muracaat etti.
Ukrainada bu malümatnı red eteler. Ukraina Devlet sıñır hızmetiniñ matbuat hızmeti bildire ki, iç bir Ukraina vatandaşı Rusiyede qaçaq statusını almaq niyeti bar olğanını bildirmedi.
2014 senesi yanvarniñ 1-den başlap vizasız memleketler vatandaşlarınen bağlı migratsion qanunlarınıñ yañı deñişmeleri işke tüşürildi. Endiden soñ Rusiye ile vizasız añlaşmalar tizilgen memleketlerniñ (olarnıñ sırasına Ukraina da kire) vatandaşları Rusiye Federatsiyasında 3 ay devamında buluna bileler, soñra ise 3 ayğa Rusiyeni terk etmek kerekler. Bulunuv müddetini arttırmaq içün çetel vatandaşı ruhset vesiqasını (iş patenti, iş ruhseti, vaqtınca yaşav ruhseti, yaşav ruhseti ve il.) almalı.
