Qırımtatar Milliy Meclisiniñ Reisi Refat Çubarov Prezident Memuriyetiniñ sabıq yolbaşçısı Sergey Lövoçkinni «qırımtatarlarnıñ temsil organı yoq etilmesiniñ mefkürecisi» dep adladı.
Bunı o Facebook saifesinde bildirdi.
«Lövoçkin Ukrainada qırımtatarlarnıñ temsil organı – Meclis – yoq etilmesiniñ tarafdarı ve tarqatıcılarından biridir. O, bu vazifeni becermese de, 2010 senesiniñ avgust ayından berli qırımtatarlarnı merkeziy ve yerli (Qırım) akimiyet ile devamlı ve ağır qarşılıqqa oğrattı», – dep yazdı Çubarov.
Bundan ğayrı, «Lövoçkin yolbaşçılığında Ukraina Prezidenti Memuriyeti Qırımda Rusiye tarafdarı olğan teşkilâtlarnı quvetleştirdi», – dep qayd etti Çubarov.
