Qırım «akimiyetiniñ» yaqında qabul etilgen «qanunınıñ» bazı maddeleri Qırımtatar Milliy Meclisine açıq tedbirlerni yasaq etmek içün aselet qayd etildi.
Bunıñ kibi fikirni Meclis Kâtibiyetiniñ yolbaşçısı Dilâver Akiyev Qırım.Aqiqat saytına bildirdi.
Meclis vekiliniñ qayd etkenine köre, cumhuriyet «qanunında», aynı rusiyeli qanunına köre, tedbir teşkilâtçıları içün bir talap bar – yuridik şahısnıñ qayd etilmesi aqqında şeadetnameni köstermektir.
«Añlağanıma köre, bu şey aselet yapıldı, Qırımtatar Milliy Meclisine açıq tedbirlerni – barışıq miting ve ilâhre – keçirmege imkân bermemek içün yapıldı, çünki onıñ böyle bir şeadetnamesi yoq», – dep ayttı Akiyev.
Bunıñnen beraber, o, ukrain ve yañı qanunları arasında farqlarnı qayd etti, onıñ fikirince, yañı qanunlar barışıq toplaşuv aqqlarınıñ yerine ketirilmesini qıyınlaştıra.
İşğal etilgen Qırımda Qırımtatar bayraq künü munasebetinen tedbir keçirilmesini yasaq etken ediler. Bundan evel mayısnıñ 18-de Sürgünlik künü munasebetinen matem tedbir keçirilmesini yasaq etken ediler.
İyülniñ 9-da «şeer şurasınıñ» nevbetten tış sessiyasınıñ birinci oquvında «Qırım Cumhuriyetinde toplaşuv, miting, numayış ve piketler aqqında» qanun qabul etildi.
Mütehassıslarnıñ fikirince, işbu vesiqa qırımlılarnıñ aq-uquqlarını sıñırlay.
