Rusiye memurlarına çetelde soy-sop olmasını yasaq ete bileler. Devlet Dumasınıñ deputatı Yevgeniy Födorov «RF devlet hızmetiniñ esasları aqqında» qanun deñişmeleriniñ qanun leyhasını azırlay, dep haber ete «İzvestiya».
Deñişmelerde yañı talap bar – vatandaşnıñ Rusiye Federatsiyasından tış daimiy sürette yaşağan soy-sopları olsa, onıñ memur vazifesinde bulunmaq aqqı yoq.
Deputatnıñ fikirince, çetelde yaşağan soy-soplar memurğa diger devletler tarafından tesir ete bileler.
Şimdilik memur ve olarnıñ qoranta azalarına çetel banklarda esap açmağa yasaq etile. Bundan evel, memurlarğa çetelde mal-mülk saibi olmaqnı qanun derecesinde bir qaç kere yasaq etecek ediler.
Neşirniñ malümatına köre, AQŞ ve AB Rusiye memurlarına qarşı cezalar kirsetip başlağan soñ, bunıñ kibi teşebbüsler ğayet aktual oldı. Böyleliknen, bir qaç on memurğa bu memleketlerge kelmege yasaq etildi, olarnıñ mal-mülki ise tevqif etildi.
