Keriç şeer şurasınıñ 53-ünci sessiya neticelerine köre, Aleksey Milovanov şeer yolbaşçısınıñ şuranıñ icra organlar faaliyeti meseleleri boyunca muavini vazifesinden boşatıldı, – dep haber ete Kerç.FM saytı.
Keriç şeer yolbaşçısı vazifelerini eda etken Roman Romanovnıñ bildirgenine köre, Milovanov öz istegi ile işten çıquv aqqında ariza yazdı.
Aynı bu sessiya qararınen daa bir qaç tayinlev oldı. Böylece, şeer yolbaşçısınıñ Şuranıñ icra organlar faaliyeti meseleleri boyunca muavini vazifesine Sergey Polivanov tayin etildi, şeer şurasınıñ işler idarecisi vazifesine – R.A.Grebennikov.
İyünniñ 30-da Keriç şeer yolbaşçısı Oleg Osadçiyni istifağa yolladılar. Deputatlar şeer yolbaşçısınıñ birinci muavini vazifesine Roman Romanovnı tayin ettiler ve oña vaqtınca şeer yolbaşçısı vazifelerini buyurdılar.
Osadçiy ariza yazğanını iyünniñ 20-de aydınlattılar. Bundan evel o, Qırımnıñ öz başına ilân etilgen baş naziri Sergey Aksönov ile körüşken edi. Kezlev şeer yolbaşçısı Andrey Danilenko ve Aluşta şeer yolbaşçısı Stanislav Kolot da istifağa çıqtılar.
