Link açıqlığı

Mayıs 3 künü milliy lider Mustafa Cemilevni Qırım ile ukraina sıñırında qarşılğan qırımtatarlar para cöremesinen cezalandılar, umumiy raqam million rublege yete.

Bunı Kiyevde ötkerilgen matbuat-konferentsiyasında Meclis reisi Refat Çubarov bildirdi.

«Bugün de bugün mayıs 3 künü Qırım ile qıtaiy Ukraina arasındaki sıñırda Mustafa Cemilevni qarşılamağa barğan tahminen 100 adam mahkemege çekildi ve million ruble miqdarında para cöremesini bermeliler», - qayd etti o.

Çubarov qayd etkeni kibi, şimdiki vaqıtta Rusiye Federatsiyası tarafından yapılğan repressiyalar yañı şekilde ötkerile.

«Qırımda ğayet havflı adisler keñişley: mühbirlerni, teşebbüsçilerni qırsızlaylar, adamlarnı öldüreler. Qırımtatar halqınıñ aqlanuvı boyunca ferman tek kâğıttır. Asılında ise, qırımtatar aqlarınıñ sıñırlavını qayd etemiz», – dedi o.

Mayıs 3 künü Mustafa Cemilevni Qırımğa yibermediler. Bu sebepten qırımtatarlar Ermeni bazar civarında numayışnı keçirdiler. Birazdan «prokuror» Natalya Poklonskaya Meclis reisi Refat Çubarovnı tenbiyelep, «ekstremistik faaliyetine yol berilmeycegini» ayttı, aksi alda Meclis yoq etilip, faaliyeti yasaqlanacaq. Bundan soñra, numayış azaları mahkemege çekildiler, olarğa para cöremesi belgilendi.

İyül 5 künü ise, Meclisniñ Herson vilâyetinde ötkerilgen toplaşuvından qaytqa Refat Çubarovnı yarımadağa yibermediler.

XS
SM
MD
LG