Rusiye ve Ukraina arasında ziddiyetke celp etilgen devletlerniñ havfsızlıq ve topraq bütünliginiñ kefaletlerine qaytmağa kerek.
Bunı BTB telekanalınıñ efirinde qırımtatar milliy Meclis reisi Refat Çubarov bildirdi.
«Yüz bergen vaqia qanunsızdır, halqara tertibatını bozğan bir şeyni yalıñız yoq etmek yeterli degildir. Er şeyni ğayrıdan pekitmek kerek. Biz şimdi bu vaziyetke celp etilgen devletlerniñ havfsızlıq ve topraq bütünliginiñ kefaletlerine qaytmalımız», – dedi Çubarov.
O şunı da qayd etti ki, Qırımnıñ öz başına tayin etilgen akimiyetiniñ onı Qırımğa kirsetmemek qararı sebebinden bir sıra teşkilât oña insan aqları boyunca Avropa mahkemesine davanı azırlamağa yardım ete.
«Bu qararnıñ insan aqları boyunca Avropa mahkemesinde baqılması içün bir sıra teşkilât maña yardım teklif etti. Belki de, bu yardım ile faydalanırım», – dedi Çubarov.
Bunıñ ile o şunı da aytıp keçti: onıñ şahsiy ve qırımtatarlarnıñ global meselesini çezmek içün ilk evelâ Rusiye Federatsiyası tarafından bozulğan adaletni pekitmek kerek.
«Maña ne qadar ağır olsa da, bu er şey Rusiye Federatsiyasınıñ siyaseti neticesinde fevral ayında başlanğan ve alâ daa devam etken global bozuluvlarnıñ aqibeti olğanını añlayım. Şunıñ içün şahsiy meselemni ve qırımtatarlarnıñ meselelerini çezmek içün ilk evelâ adaletni pekitmek kerek olğanını tüşünem», – dedi Çubarov.
Qırımnıñ öz başına tayin etilgen akimiyeti iyül 4-5 künleri Herson vilâyetinde Geniçiskte olıp keçken toplaşuvdan qaytqan qırımtatar milliy Meclis reisi Refat Çubarovnı Qırımğa kirsetmedi. Oña 5 yıllıq yasaqnı seslendirdiler.
Bundan soñ Qırımnıñ «baş naziri» Sergey Aksönov bu qarar Çubarovnıñ «Qırımda milletlerara ziddiyetniñ olması içün etilgen areketleri» ile bağlı olğanını ayttı.
Sürgünlik Künü arfesinde bu kibi yasaqqa qırımtatarlarnıñ milliy lideri Mustafa Cemilev de rastkeldi.
