Link açıqlığı

Avropa Birligi Ukraina zıddiyetine alâqası olğan cezalanacaq şahıslarnıñ cedveline daa 11 adamnı qoşmağa añlaştı, dep haber ete Avropa Birligi diplomatınıñ aytqanlarına esaslanıp Reuters agentligi, bildire Azatlıq Radiosı.

Bu sefer cedvelde esasen separatistler, bir-eki rusiyeli bar, aytıla beyanatta.

Olarnıñ adları Avropa Birliginiñ Resmiy mecmuasında eñ yaqın vaqıtta aydınlatılacaq, ve cezalar cumaertesi künü işke tüşürile bile, dep ayttı diplomat.

Bundan evel Avropa Birligi Rusiye ve Ukrainadan 61 insan, em de Rusiyeniñ Qırım işğalinden soñ zapt etilgen energetik şirketlerine qarşı bunıñ kibi cezalar kirsetken edi.

İyünniñ 27-de olıp keçken sammitte Avropa Birligi eñ yaqın vaqıtta Rusiye Ukrainada cenkleşken separatistlerden arbiy areketler toqtatılmasını talap etmese, daa da sert cezalar olacağını bildirgen edi.

Avropa Birliginiñ talapları arasında – OSCE nezareti altında eki taraflı ateş toqtatılması, Rusiye ile bütün sıñırnı Kiyev nezareti altına qaytaruv, esir alınğanlarnı azat etüv ve Ukraina prezidenti Petro Poroşenkonıñ barışıq planını amelge keçirüv boyunca muzakereler başlanmasıdır. Cedveldeki yañı adlar mezkür talaplarğa riayet etmegenlerge ait.

Avropa Birliginiñ nevbetteki sammiti iyülniñ 16-na planlaştırıla, anda cezalar meselesi de baqılacaq.

Avropa Birligi ve AQŞ Rusiyeni cezalarnıñ üçünci basamağı ile çoqtan qorquzalar, lâkin ara-sıra cezalar kirsetilmesiniñ şartlarını deñiştireler.

XS
SM
MD
LG