İşğal etilgen Qırım paytahtında çoq qatlı evlerniñ biri üstünde Rusiyege qarşı mananı ifadelegen yazı peyda oldı.
Qırım.Aqiqat mühbiriniñ bildirgenine köre, bellisiz müellifler «Beraber faşizmge qarşı» yazısını «Beraber raşizmge qarşı» yazısına çevirdiler.
Yerli soqaq ressamları «F» arifini «R» arifine deñiştirip, yazını tüzettiler.
Endiden soñ Aqmescitniñ «Moskoltso» rayonında, bazar qarşısında, er kün biñlernen adamnıñ közüne çarpqan «Beraber raşizmge qarşı» yazısı mevcut.
İlk sefer Aqmescit eviniñ divarı üstünde yazı 2009 senesi Moskvada öldürilgen Anastasiya Baburova ve Stanislav Markelov hatırasına 2010 senesi peyda olğan edi.
Uquq qorçalayıcılar ve faşizmge qarşı çıqqanlar er sene olarnıñ ölüm künü hatıra aktsiyalarını keçireler, olardan biri vaqtında Kiyevskaya soqağındaki evinde «Beraber faşizmge qarşı» yazısı peyda olğan edi.
