Link açıqlığı

Aksönov qırımlılarnıñ pasportlarında hatalar bedava tüzetilmesini talap etti


Qırımlılarnıñ Rusiye vatandaşı pasportlarında hata olsa, olarnı bedava tüzetmek kerekler. Bunı iyülniñ 9-da Qırımnıñ öz başına ilân etilgen baş naziri Sergey Aksönov bildirdi, dep haber ete Qırım «ükümetine» yaqın olğan «Krıminform» saytı.

Aksönov toplaşuv protokolında Federal migratsion hızmetiniñ territorial organlarına pasport hatalarını bedava tüzetüv aqqında avalesini qayd etmege emir etti.

«Adamlar telefon etip, şikâyet eteler, pasportlarda hataları olğan adamlarnı vesiqalarnı ğayrıdan resmiyleştirmek içün para tölemege zorlaylar, dep aytalar. Vatandaşlardan hata tüzetüvi içün para alınmaycaq. Qarar alsınlar, neler kerek ögrensinler, lâkin daa bir kere tekrarlayım: memurlarnıñ qabaatından bir de bir hatalar olsa, vatandaşlardan para alınmaycaq», – dep ayttı Qırımnıñ öz başına ilân etilgen baş naziri.

Rusiye pasportlarını elde etken qırımlılar yañı vesiqalarda müür ve imza olmağanını qayd etip başladılar.

Pasportnı bergen organ ve onı berüv vaqıtı qayd etilgen saifede vesiqanı bergen şahısnıñ imzası, tögerek müür ve pasport saibiniñ imzası olmaq kerek – qara qalemnen. Bu şey olmasa, Rusiye vatandaşınıñ pasportı sahte olaraq tanıla.

XS
SM
MD
LG