Rekonstruktsiya ve inkişaf Halqara bankı Ukrainağa içtimaiy qol tutuv programmasına 300 million dollarnı ayırmağa qarar aldı. Bunı iyülniñ 9-da ükümet toplaşuvında Ukraina baş naziri Arseniy Yatsenük bildirdi.
«Rekonstruktsiya ve inkişaf Halqara bankı ile bizim programmamız içtimaiy istiqrar olmasını saqlap qaldırmağa yardım etmek kerek», – dep ayttı baş nazir.
Onıñ aytqanına köre, bu sermiya eñ evelâ Ukraina vatandaşlarınıñ imtiyazları ve tazminatlarına sarf etilecek.100 million dollar doğrudan-doğru Ukraina içtimaiy siyaset Nazirligi başlağan qol tutuv programmasına kete.
Yatsenük Ukraina içtimaiy siyaset naziri Lüdmila Denisovağa muracaat etip, küzde Ukraina vatandaşları diger tarifler boyunca esaplarnı alğanda, ükümet «ukrainlilerge fiyat ve tarifler artmasından tazminat programmasını azırlamağa» yetiştirsin, dep avale etti.
