Rusiye Federatsiyasınıñ tış işler naziri Sergey Lavrov Qırımğa silâlı ücüm ğayesini, şu cümleden – onı Ukrainağa qaytarmaq içün, baqmamağa bile tevsiye ete.
Bunı o İtaliya zenaatdaşı Federika Mogerini ile körüşüvden soñ matbuat konferentsiyasında bildirdi.
«Men bunı yapmağa bir kimsege tevsiye etmez edim. Bizde milliy havfsızlıq mezepi bar, oña köre böyle vaziyette yapılacaq areketler belli», – dep ayttı Lavrov.
Valeriy Geletey Ukraina mudafaa naziri vazifesine tayin etilgen soñ Ğalebe kününi ukrain Aqyarında keçirmege vade etti. Em Qırımda, em de Rusiyede bunı sert bir tenqitke oğrattılar.
2014 senesi martnıñ 16-da Qırım ve Aqyar şeerinde Qırım statusı aqqında sahte referendum olıp keçti. Onıñ neticesinde Rusiye Qırımnı öz terkibine qabul etti. Ukraina, Avropa Birligi, AQŞ işbu rey berüvni tanımayıp, Qırım Rusiye tarafından işğal etildi degen fikirdeler.
«Referendumdan» soñ AQŞ ve AB Rusiye vatandaşlarına qarşı ceza kirsettiler. Kelmesi yasaq etilgen şahıslar cedvelleri belgilendi ve olarnıñ esapları blok etildi. Ğarp Rusiyeni Ukrainağa nisbeten istilâ sebebinden cezalarnıñ yañı basamağınen qorquzmağa devam ete.
