«Qırım Cumhuriyetiniñ yolbaşçısı» «Devlet Şurasınıñ» deputatları tarafından Rusiye Federatsiyasınıñ prezidentinen taqdim etilgen üç namzetten saylanılacaq, dep ayttı jurnalistlerge Qırım «spikeri» Vladimir Konstantinov.
Bunı Qırım «parlamentiniñ» matbuat hızmeti bildire.
Konstantinovnıñ aytqanına köre, Rusiye prezidenti namzetlerni aydınlatqan soñ 5 kün devamında Qırım «parlamentinde» keçirilgen mesleatlar ve muzakerlerden soñ açıq rey berüv ötkerilmeli.
Konstantinovnıñ bildirgenine köre, namzetlerden iç bir kimse zarur olğan reyler sayısını qazanmasa, eñ çoq reyni qazanğan eki namzet boyunca rey berüv tekrar ötkerilecek. Tekrar keçirilgen rey berüvde reylerniñ çoqusını qazanğan namzet saylanğan olaraq sayılacaq.
«Qırım Cumhuriyeti Devlet Şurasınıñ» «Qırım Cumhuriyetiniñ yolbaşçısını» saylav aqqında qararı Qırım «parlamentiniñ» qararınen resmiyleştirile.
İyülniñ 9-da Qırım «parlamentiniñ» deputatları «Qırım Cumhuriyeti Yolbaşçısını saylav tertibi aqqında» «qanunnı» birinci oquvda qabul ettiler.
Qırım işğalinden soñ «Qırım Cumhuriyetiniñ yolbaşçısı» vazifelerini Sergey Aksönov eda ete.
