Link açıqlığı

Zaur Smirnov: regional Meclisler Qırımdaki küz saylavlarına faal sürette azırlıq köreler


Заур Смирнов

Bazı regional meclisler Qırım saylavlarında faal sürette iştirak etmege qarar aldılar.

Bunı Qırımtatar Milliy Meclisi tarafından «ükümetke» namzeti kösterilgen ve «Milletlerara munasebetler ve sürgün olunğan grajdanlarnıñ işleri boyunca Devlet komitetiniñ» yolbaşçısı olğan Zaur Smirnov öz başına ilân etilgen «akimiyetke» yaqın olğan Krıminform saytına bildirdi.

«Bugün bazı regional meclisler Qırım saylavlarında faal sürette iştirak etmege qarar aldılar. Yani yerlerde adamlar çalışa, iş kete, bu esnasnı toqtatmaq mümkün degil, çünki saylavlarda iştirak etüv – cumhuriyet yaşayışında iştirak etüvdir», – dep ayttı Smirnov.

Onıñ fikirince, qırımtatarlar «akimiyetnen» iş birlikni toqtatmaq degil de, onı inkişaf ettirmek kerekler.

İyül 4-5 künleri Geniçeskte olıp keçken Qırımtatar Milliy Meclisiniñ toplaşuvında 2014 senesi aprelniñ 1-de Meclis tarafından Qırım «akimiyet» organlarına eki vekilni yollamaq qararını lâğu etmege añlaştılar.

«Baş nazir muavini» Lenur İslâmov işten boşatılğan soñ Qırım «akimiyetinde» Meclis tarafından namzeti kösterilgen vekillerden yalıñız Zaur Smirnov qala.

XS
SM
MD
LG