Vahşiyce öldürilgen Reşat Ametovnıñ ailesi qırımtatarlarnıñ milliy lideri, Ukraina halq deputatı Mustafa Cemilevden 10 biñ dollar miqdarında maddiy yardımnı elde etti, dep haber ete QHA.
Mustafa Cemilevniñ Qırımğa kiriş yasağı bar olğanından sebep onıñ elâk olğannıñ qorantasına para bermek imkânı yoq, onıñ içün bu iş onıñ yardımcısı Riza Şevkiyevke buyurıldı. Cemilev agentlikke bergen malümatına köre, 10 biñ dollar şahsen oña Poloniyada «Birdemlik» mukâfatı berilgen 250 biñ yevrodan ayırıldı.
«Reşat Ametovnıñ öldürüvinden soñ apayı özü balalarını baqa. Bizler bar olğan küçümizge köre bunıñ kibi qorantalarğa yardım etmege tırışamız. Bu para şahsen menim içün belgilengen mukâfat qısmından berildi», – dep ayttı Cemilev.
Öldürilgenniñ apayı Zarina Ametova dey ki, qabaatlılarnı alâ daa tapmadılar.
«Bir şey belli degil. Taqiqat alıp barıla, dep aytalar, lâkin men inanmayım», – dep ayta qadın.
Aqayınıñ facialı ölüminden soñ o özü 3 kiçik balanı baqmağa mecbur. Qadınnıñ aytqanına köre, bütün dünyadan kelgen yardım maddiy qıyınlıqlarnı yeñmege yardım ete. Onıñ bildirgenine köre, balalar içün urba Romaniya, Türkiye, Almaniya, AQŞ, Ukraina ve diger memleketlerden kele.
Agentlikniñ malümatına köre, aman-aman bütün sermiya Ametovlar qorantasınıñ aqayı qurmağa başlağan ev işlerine sarf etile.
39 yaşında Reşat Ametov Qırım Nazirler Şurasınıñ binası yanında ötkergen piket vaqtında ğayıp oldı. Ukraina kütleviy haber vastaları tarafından tarqatılğan video levhalarına köre, bellisiz adamlar onı tutıp, maşinanen alıp kettiler. Ametovnıñ cesedini martnıñ 15-de Qarasuvbazar rayonınıñ Ortalan köyündeki alanında taptılar.
Mustafa Cemilev Poloniya tış işler nazirligi tarafından meydanğa ketirilgen «Birdemlik Mukâfatını» iyünniñ 3-de elde etti.
Mukâfat üç qısımdan ibaret: 250 biñ yevro – şahsen laureat içün, ğalip Poloniya amelge keçirecek 700 biñ yevrolıq programmalarnı belgiley bile, ve 50 biñ yevro ğalipniñ Poloniya seyahatına sarf etilecek.
